2020-04-22 17:13:12, 1659 ნახვა

---

მეზვრიშვილი ოპოზიციას - რჩება შთაბეჭდილება, რომ უნდა გვქონდეს გარდაცვალების ათობით, ასობით შემთხვევა, რომ საგანგებო მდგომარეობის გაგრძელებას მხარი დაუჭიროთ და ეს ძალიან სამწუხაროა

"კარგად იცით, რომ არ ყოფილიყო ეს შეზღუდვები და პარლამენტს, პრეზიდენტს საგანგებო მდგომარეობა არ გამოეცხადებინა, დღეს გაცილებით მეტი ინფიცირებული გვეყოლებოდა", - ასე მიმართა მთავრობის ადმინისტრაციის უფროსმა ნათია მეზვრიშვილმა ოპოზიციონერ დეპუტატებს პარლამენტის საგანგებო სხდომაზე, დასკვნითი სიტყვით გამოსვლისას.

მთავრობის ადმინისტრაციის უფროსის შეფასებით, ძალიან სამწუხაროა, რომ ოპოზიცია არ ხედავს იმ პოზიტიურ შედეგებს, რაც საგანგებო მდგომარეობის გამოცხადებამ თუნდაც ჯანდაცვის სისტემისთვის დროის მოგების კუთხით მოიტანა.

„რჩება შთაბეჭდილება, რომ უნდა გვქონდეს გარდაცვალების ათობით, ასობით შემთხვევა, რომ საგანგებო მდგომარეობის გაგრძელებას მხარი დაუჭიროთ და ეს ძალიან სამწუხაროა. არ აფასებთ, რა პოზიტიური შედეგები მოგვიტანა საგანგებო მდგომარეობის გამოყენებამ მთელ ამ პერიოდში თუნდაც ჯანდაცვის სისტემისთვის დროის მოგების კუთხით და ძალიან სამწუხაროა, რომ ამის დანახვა არ გინდათ. ეს არის ფაქტი. თქვენ ცდილობთ, რომ გარკვეულწილად შეასუსტოთ ჩვენი არგუმენტები და აქცენტები გადაიტანოთ ანტიკრიზისულ გეგმაზე, რომელიც ძალიან მნიშვნელოვანია და ეს არაერთხელ მითქვამს. მნიშვნელოვანია, მოქალაქეებმა იცოდნენ ეკონომიკური და სოციალური პრობლემები როდის მოუგვარდებათ. თქვენამდე ეს ჩვენ ვთქვით და მნიშვნელოვანია, მაგრამ ამას ახლა ისე წარმოაჩენთ, თითქოს ამ გეგმის დღეს წარმოდგენა გჭირდებოდათ, რომ საგანგებო მდგომარეობის გაგრძელებისთვის მხარიდ აგეჭირათ, როდესაც ამის ძირითადი საფუძველი არის არსებული ეპიდემიოლოგიური მდგომარეობა. თქვენ ხომ კარგად იცით, რომ გადაადგილების შეზღუდვამ, საზოგადოებრივი ტრანსპორტის შეზღუდვამ, დისტანციის დაცვის მოთხოვნამ და ამ მხრივ დაწესებულმა სხვა შეზღუდვებმა მოიტანა ის შედეგები, რაც დღეს გვაქვს, მაგრამ ამის დანახვა არ გინდათ", - განაცხადა ნათია მეზვრიშვილმა.

მთავრობის ადმინისტრაციის უფროსმა აღნიშნა, რომ გარკვეული კითხვის ნიშნები არსებობს ზოგიერთ შემთხვევაში შერჩევით მიდგომასთან დაკავშირებით, თუმცა ასეთი ერთეული შემთხვევებია.

„გარკვეული ხარვეზები იქნება და ამ ერთი და ორი ხარვეზის გამო თქვენ მოქალაქეებს ეუბნებით, რომ მასობრივად, მიდგომა შერჩევითია, კანონი არ სრულდება და მოდით, თქვენც არ დაემორჩილოთ ამ შეზღუდვებს. თქვენ არ ითვალისწინებთ იმას, რომ ხვალ თუ ისინი შეზღუდვებს არ დაემორჩილებიან, ამას შეიძლება მოჰყვეს იტალია, ესპანეთი და თუ თქვენ ამ პასუხისმგებლობას იღებთ, კი ბატონო, ნუ დაუჭერთ მხარს საგანგებო მდგომარეობის გაგრძელებას", - მიმართა ნათია მეზვრიშვილმა დეპუტატებს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი