დოლიძე: „ოცნება“ შეწუხებულია - ეს ჩემი პოლიტიკური დევნაა, როგორც სისტემის წინააღმდეგ მებრძოლი ხმის წინააღმდეგ

2019-10-25 15:34:00, 1456 ნახვა

კომენტარი

იუსტიციის უმაღლესი საბჭოს არამოსამართლე წევრი ანა დოლიძე საბჭოს მოსამართლე წევრების მიერ პრეზიდენტ სალომე ზურაბიშვილისადმი გაგზავნილ მიმართვას ეხმაურება და აცხადებს, რომ მის წინააღმდეგ პოლიტიკური დევნაა დაწყებული.

როგორც დოლიძემ გამართულ ბრიფინგზე განაცხადა, ის პოლიტიკურ საქმიანობას არ ეწევა და იუსტიციის საბჭოს სურვილი არ აქვს ერთმანეთისგან პოლიტიკური და საზოგადოებრივი საქმიანობები გაარჩიოს.

"ქართული ოცნება" შეწუხებულია კრიტიკული ხმების აქტიურობით და ასევე შეწუხებულია "ქართული ოცნების" ინტერესების განმახორციელებელი იუსტიციის უმაღლესი საბჭო. ის იმდენად შეწყხებულია, რომ დღეს მიიღეს სრულიად უკანონო გადაწყვეტილება, რომ მიემართათ პრეზიდენტისთვის. ამავე დროს, ნათელია, რომ იუსტიციის საბჭოს არ სურს გაარჩიოს საზოგადოებრივი საქმიანობა და პოლიტიკური საქმინობა. კანონი კრძალავს იუსტიციის საბჭოს წევრისთვის, არ შეიძლება იყოს პოლიტიკური პარტიის წევრი ან მონაწილეობდეს პოლიტიკურ საქმიანობაში. ვფიქრობ, რომ ეს არის პოლიტიკური დევნა ჩემი, როგორც სისტემის წინააღმდეგ მებრძოლი ხმის წინააღმდეგ. ვფიქრობ, რომ ქალბატონი სალომეს შესაძლო გადაწყვეტილება იქნება ლაკმუსის ტესტი, რამდენად გახდება ის ამ პოლიტიკური დევნის ნაწილი ან რამდენად იქნება ის სისტემის მანკიერების წინააღმდეგ კრიტიკული ხმების მხარეს", - განაცხადა ანა დოლიძემ.

ცნობისთვის, იუსტიციის საბჭო პრეზიდენტს ანა დოლიძისთვის უფლებამოსილების შეწყვეტას სთხოვს.