ექსპერტი საერთაშორისო საკითხებში სოსო ცინცაძე მიიჩნევს, რომ ერევანში მიმდინარე პროცესები ხელისუფლების შეცვლას არ გამოიწვევს. თუმცა, როგორც ცინცაძემ "ექსპრესნიუსთან" საუბარში აღნიშნა, აქციები გარკვეულ შედეგეს აუცილებლად გამოიღებს და სომხეთის პრემიერს დათმობებზე წასვლა მოუწევს. 

„რითაც არ უნდა დასრულდეს ერევნის მოვლენები, ის კვალს დატოვებს. თუნდაც დარჩეს სერჟ სარგისიანი პრემიერად, ის იძულებული გახდება, ფართომასშტაბიანი ღონისძიებები თუ არა, კორუპციის წინააღმდეგ რამე მოქმედებები ჩაატაროს“, - განაცხადა ცინცაძემ. 

ექსპერტმა, სარგსიანის პოზიციების შესაძლო დათმობა, სომხეთის ახალგაზრდების პოლიტიკურ აქტიურობას მიაწერა. მისი განმარტებით, ერევანის ახალგაზრდობას ჯერ კიდევ შემორჩა პროტესტის გრძნობა.

”წელიწადნახევრის წინ, როდესაც ტარიფები გაიზარდა, ასიათასობით ადამიანი ქუჩაში გამოვიდა. ერევანის საზოგაოდება პოლიტიკური თვალსაზრისით, გაცილებით აქტუალური და აქტიურია. სომხები ახლა ძირითადად კორუპციისა და ხელისუფლების თავგასულობის წინააღმდეგ გამოდიან, თუმცა წელიწადნახევრის წინ ტარიფების გაზრდის დროს მთელი მოსახლეობა სამი დღე ყურზე იდგა“, - აღნიშნა სოსო ცინცაძემ.

კითხვაზე, თუ როგორ იმოქმედებს აქციები სომხეთის საგარეო პოლიტიკაზე - სოსო ცინცაძემ განმარტა, რომ საგარეო ცვლილებები გამორიცხულია იმ ფონზე, როცა სომხეთ–აზერბაიჯანული ფართომასშტაბიანი კონფლიქტი არსებობს.

"რუსეთი მშვიდად არის და გიუმრიში მისი სამხედრო ბაზის ყოფნას არანაირი საფრთხე არ ემუქრება. თვითონ მომიტინგეებიც კი, ფრთხილად ეკიდებიან რუსეთის თემას. თუმცა რუსული პრესა ინფორმაციას ავრცელებს იმის შესახებ, რომ შესაძლოა, აზერბაიჯანის პრეზიდენტმა ალიევმა ისარგებლოს შიდა დაძაბულობით და იერიში განახორციელოს. აზერბაიჯანის არმია თავს იყრის სომხეთის  საზღვართან, ეს იმის მანიშნებელია, რომ შესაძლოა ალიევმა შიდა პროტესტები რევანშისათვის გამოიყენოს", - აღნიშნავს ექსპერტი.

შეგახსენებთ, რომ 31 მარტიდან პარტია „სამოქალაქო თანხმობა“ სომხეთის ქალაქებში მსვლელობებს მართავდა, რაც 13 აპრილს ერევანში გამართული მიტინგით და საფრანგეთის მოედანზე მჯდომარე აქციით დასრულდება. 14 აპრილს აქციის მონაწილეები სომხეთის საზოგადოებრივი რადიოს შენობაში შეიჭრნენ და ეთერი მოითხოვეს. ოპოზიცია გრძელვადიან აქციებსა და გაფიცვებს აანონსებს. აქციის მონაწილეები პრემიერ–მინისტრად სერჟ სარგისიანის დანიშვნას აპროტესტებენ. ამასთან, სომხეთის პარლამენტმა პრემიერის პოსტზე სერჟ სარგისიანი 17 აპრილს ხმათა უმრავლესობით დაამტკიცა.

სალომე უბირია

ავტორი: ,

სოციალური ქსელები

კალაძე: კომპანია მარიჯანის N4-ში რომელიც ამჟამად აწარმოებს სამუშაოებს, თავად დაზარალებულებმა შეარჩიეს

თბილისში უკრაინაში დაღუპული მოხალისეების ხსოვნისადმი მიძღვნილი მსვლელობა გაიმართება

შეერთებულმა შტატებმა საქართველოს სასაზღვრო კომუნიკაციებისთვის ათობით როუტერი გადასცა

შინაგან საქმეთა სამინისტრომ „ქურდულ სამყაროსთან” კავშირში მყოფი 29 პირი დააკავა, ხოლო 3 პირს ბრალი დაუსწრებლად წარედგინება, მათ შორის ერთი ”კანონიერი ქურდია”