კომპანია „სითი პარკში“ აცხადებენ, რომ თბილისის მერიასთან მოლაპარაკებების პროცესში ორივე მხარის ინტერესების დაკმაყოფილება მოხდება.

ამის შესახებ „სითი პარკის“ წარმომადგენელმა ლევან ტაბიძემ „ექსპრესნიუსთან“ საუბარში დედაქალაქის მერიასთან გაფორმებულ ხელშეკრულებაში ცვლილებების შეტანის საკითხის კომენტირებისას განაცხადა.

ტაბიძის თქმით, ამ ეტაპზე თბილისის მერიის მიერ კომპანიისათვის წარდგენილი პუნქტების განხილვა მიმდინარეობს და დამატებითი ინფორმაცია საზოგადოებისათვის მოგვიანებით გახდება ცნობილი.

„თითოეულ პუნქტს ძალიან ბევრი ქვეპუნქტი აქვს და შესაბამისად, ამჟამად განხილვის პროცესი მიმდინარეობს. თუ რაიმე მიუღებელი იქნება კომპანიისათვის, ამის შესახებ საზოგადოებისათვის ცნობილი გახდება. მაქსიმალურად შევეცდებით, რომ ორივე მხარის ინტერესების დაკმაყოფილება მოხდეს. თუმცა ეს იმას არ ნიშნავს, რომ ყველაფერი დაკმაყოფილდება ან არაფერი. ჩვენ ტენდერში იმ პირობებით გავიმარჯვეთ, რაც გამოცხადებული იყო და დღემდე ამ პირობებით ვმუშაობდით“, - განაცხადა ლევან ტაბიძემ.

მისივე თქმით, თავად „სითი პარკის“ მხრიდან დედაქალაქის მერიისათვის გაფორმებულ ხელშეკრულებაში ცვლილებების შეტანის მიზნით რაიმე წინადადების წარდგენა არ მომხდარა.

შეგახსენებთ, თბილისის მერიამ კომპანია „სითი პარკს“ მოთხოვნათა პაკეტი წარუდგინა. მერიის ერთ-ერთი მთავარი მოთხოვნა ავტომანქანების საჯარიმოზე გადაყვანის ნაცვლად, მათი ადგილზე დაჯარიმებაა. კიდევ ერთი მოთხოვნა შემოსავლების განაწილების თანაბრობას უკავშირდება. საუბარია ტროტუარებზე პარკირების შეზღუდვასთან დაკავშირებითაც. არსებული ინფორმაციით, თბილისის მერია უახლოეს ხანში "სითი პარკის" წარმომადგენლებთან სამუშაო შეხვედრას გამართავს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

აზერბაიჯანელმა პოლიტპატიმრებმა ფონ დერ ლაიენს ბაქოში ვიზიტის დროს ადამიანის უფლებების საკითხების წამოჭრისკენ მოუწოდეს

რუსეთის ელიტა ომის ესკალაციისთვის ემზადება უკრაინის მიერ რუსეთის სიღრმეში თავდასხმების შემდეგ - The Washington Post

ცოტნე ივანიშვილი პარლამენტში ცემა-ტყეპაზე - ხელი როგორ მოხვდა, რა ფორმით მოხდა, რა სიძლიერით მოხვდა, ამის ზომვა როგორ უნდა დავიწყოთ?

ოლიგარქის ვაჟს ცოტნე ივანიშვილს ოცნების ახალგაზრდული ორგანიზაცია აბარია და ამბობს რომ პოლიტიკაში ჩართვის ინტერესი არ აქვს