პრეზიდენტი: მიხარია, რომ დებატები შედგა, მიუხედავად იმისა, რომ საკუთარი თავის მიმართ ბევრი კრიტიკა მოვისმინე

2017-04-07 21:20:56, 2001 ნახვა

პოლიტიკა

„ნამდვილად გამოჩნდა, რომ საქართველოს პარლამენტს სჭირდება პოლიტიკური მსჯელობა და დებატები, მიხარია, რომ ეს დებატები შედგა“,-ამის შესახებ საქართველოს პრეზიდენტმა გიორგი მარგველაშვილმა პარლამენტში ყოველწლიური ანგარიშით გამოსვლის შემდეგ გამართული დებატების დასრულების შემდეგ განაცხადა.

პრეზიდენტის თქმით, მან კრიტიკა მოისმინა, რაც დემოკრატიის შემადგენელი ნაწილია.

„პირველ რიგში მინდა მადლობა გითხრათ, საქართველოს პარლამენტში შედგა დებატები, ეს დებატები იყო ძალიან ფართე მრავლისმომცველი. ნამდვილად გამოჩნდა, რომ საქართველოს პარლამენტს სჭირდება პოლიტიკური მსჯელობა, პოლიტიკური დებატები და აზრის გამოთქმა. მიხარია, რომ ეს დებატები შედგა. მიუხედავად იმისა, რომ მე ძალიან ბევრი კრიტიკა მოვისმინე საკუთარი თავის მიმართ. ეს არის დემოკრატიის შემადგენელი ნაწილი. ერთის მხრივ სახელისუფლებო მხარე მაკრიტიკებდა იმასთან დაკავშირებით, რომ ვიყავი ზედმეტად კრიტიკული. მე ვცდილობ პარლამენტში წარმოვადინო ხალხის აზრი და ხალხის შეხედულებები“,-განაცხადა პრეზიდენტმა.