მელია მერაბიშვილზე: თუ ის უარს ამბობს თანამდებობაზე, შესაბამისი გადაწყვეტილება იქნება მისაღები

2017-01-20 19:04:02, 1365 ნახვა

პოლიტიკა

თუ ის უარს ამბობს თანამდებობაზე, შესაბამისი გადაწყვეტილება იქნება მისაღები, - ასე ეხმაურება "ნაციონალური მოძრაობის" პოლიტსაბჭოს თავმჯდომარე ნიკა მელია ვანო მერაბიშვილის მიერ გავრცელებულ განცხადებას, სადაც მერაბიშვილი განმარტავს, რომ „ნაციონალური მოძრაობის“ დღევანდელ ყრილობაზე გენერალურ მდივნად არჩევაზე თანხმობა არ განუცხადებია.

როგორც ნიკა მელიამ "რუსთავი 2"-ის პირდაპირ ეთერში განაცხადა, მათ არც ჰქონიათ ვანო მერაბიშვილის თანამდებობიდან გადაყენების მცდელობა. მისივე თქმით, უკანასკნელი დღეების განმავლობაში ჰქონდათ კომუნიკაცია, რომ მერაბიშვილს გაეკეთებინა საჯარო განცხადება თუ რა პოზიციას იჭერდა, თუმცა ის თავს იკავებდა და რამდენიმე დღის წინ განაცხადა რომ არ ერეოდა პარტიულ უთანხმოებაში.

“ჩვენ არც კი გვქონია მცდელობა ვანო მერაბიშვილის თანამდებობიდან გადაყენების, ჩვენ ვიცით, რომ ადამიანი არის გამოკეტილი 4 კედელში ივანიშვილის მიერ და აქედან გამომდინარე ყველაფერს, რომ თავი დავანებოთ უზნეობაა, რომ გადააყენო ადამიანი რომელიც არის ივანიშვილის მიერ გამოკეტილი. ჩვენ უკანასკნელი დღეების განმავლობაში გვქონდა კომუნიკაცია, რომ მას გაეკეთებინა საჯარო განცხადება თუ რა პოზიციას იჭერდა, თუმცა ის თავს იკავებდა და რამდენიმე დღის წინ განაცხადა რომ არ ერეოდა პარტიულ უთანხმოებაში,“ - განაცხადა ნიკა მელიამ.

მისივე თქმით, ის მომავალ კვირას სასჯელაღსრულების დაწესებულებაში ვანო მერაბიშვილის ნახვას აპირებს.

"მე პირადად მსურს მომავალ კვირას, სასჯელაღსრულების დაწესებულებაში ვესტუმრო ვანო მერაბიშვილს და პირადად გავიგო მისი მოსაზრებების შესახებ. აქედან გამომდინარე, ბუნებრივია, ჩვენ მივიღებთ გადაწყვეტილებას, რომელიც საზოგადოებას ეცნობება, მაგრამ ეს იქნება დამოკიდებული თავად ვანო მერაბიშვილზე”, - განაცხადა ნიკა მელიამ.