აბაშიძე: 2008 წლის აგვისტოს მოვლენებზე ჩვენსა და რუსეთის შეფასებებში რადიკალური განსხვავება საყოველთაოდ ცნობილია

2016-12-23 20:02:55, 1442 ნახვა

პოლიტიკა

„2008 წლის აგვისტოს მოვლენებზე ჩვენსა და რუსეთის შეფასებებში რადიკალური განსხვავება საყოველთაოდ ცნობილია“,-ასე გამოეხმაურა პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე რუსეთის პრეზიდენტის მიერ დღეს გაკეთებულ განცხადებასთან.

როგორც აბაშიძემ აღნიშნა, რუსეთთან ურთიერთობაში არსებული დიდი სირთულეების მიუხედავად, ხელისუფლება მზად არის სახელმწიფოს ინტერესების სრული დაცვით რუსეთთან დიალოგი გააგრძელოს. რაც შეეხება სავიზო რეჟიმის გამარტივებას ან გაუქმებას,აბაშიძის თქმით, საქართველოს ხელისუფლებამ, ჯერ კიდევ 2011 წლიდან, ცალმხრივად გააუქმა რუსეთის მოქალაქეებისთვის სავიზო მოთხოვნები.

„თუკი რუსეთის მხარე გადადგამს შემდგომ ნაბიჯს, ჩვენ ამას მივესალმებით, თუმცა ეს გადაწყვეტილება მათი პრეროგატივაა. საქართველო აღიარებულია უსაფრთხო ქვეყნად, რისი დასტურიც არის ბოლო წლებში საქართველოს მიერ სავიზო რეჟიმის გამარტივება ცალკეულ ქვეყნებთან, მათ შორის უახლოეს პერიოდში შენგენის ზონის ქვეყნებთან უვიზო მიმოსვლის დაწესება“,-განაცხადა აბაშიძემ.