კარასინი: ქართული მხარე რუსეთთან დიპლომატიური ურთიერთობების აღდგენისთვის მზად არ არის

2016-11-03 20:13:49, 895 ნახვა

პოლიტიკა

“ქართული მხარე კვლავ არ არის მზად, რუსეთთან დიპლომატიური ურთიერთობები აღადგინოს, რომლებიც 2008 წლის სექტემბერში გაწყვიტა, - ამის შესახებ რუსეთის საგარეო საქმეთა მინისტრის მოადგილემ, გრიგორი კარასინიმა "რია-ნოვოსტისთვის” მიცემულ ინტერვიუში განაცხადა.

კარასინის განცხადებით, მოსკოვსა და თბილისს შორის ამჟამად არსებული ურთიერთობების ერთმნიშვნელოვანი შეფასება შეუძლებელია.

“ერთი მხრივ, ბოლო ოთხი წლის განმავლობაში შესაძლებელი გახდა ორმხრივი ურთიერთობების მნიშვნელოვნად გაჯანსაღება, მათი გამოყვანა ჩიხიდან, სადაც ისინი მიხეილ სააკაშვილის რეჟიმის გამო აღმოჩნდნენ. რუსეთი დაუბრუნდა საქართველოს მთავარი საგარეო ეკონომიკური პარტნიორების რიცხვს, მოხდა სატრანსპორტო კავშირის ნორმალიზება, აქტიურად ვითარდება ტრადიციული ჰუმანიტარული კონტაქტები, კულტურული ურთიერთობა. მიღწეულია საკმაოდ ხელშესახები შედეგები, რომლებიც სრულად პასუხობს ჩვენი ორი ქვეყნის მოქალაქეების ინტერესებს”, - განაცხადა დიპლომატმა.

ამასთან, როგორც კარასინმა განმარტა, თბილისი პერიოდულად კონფრონტაციულ რიტორიკას მიმართავს.

“ქართული მხარე კვლავ არ არის მზად, რუსეთთან დიპლომატიური ურთიერთობები აღადგინოს, რომლებიც 2008 წლის სექტემბერში გაწყვიტა. ოფიციალური თბილისის პერიოდულად მიმართავს კონფრონტაციულ რიტორიკას ჩვენი ქვეყნის მისამართით. ეს, რბილად რომ ვთქვათ, ზემოხსენებულ პოზიტიურ ტენდენციებს მდგრადობას არ სძენს. ამის შესახებ მუდამ ვეუბნები საქართველოს პრემიერ-მინისტრის სპეციალურ წარმომადგენელს რუსეთთან ურთიერთობების საკითხებში ზურაბ აბაშიძეს ჩვენი რეგულარული დიალოგის მიმდინარეობისას”, -აღნინა რუსეთის საგარეო საქმეთა მინისტრის მოადგილემ.

მისივე ინფორმაციით, ამ ეტაპზე რუსეთის პრეზიდენტის ვლადიმირ პუტინისა და საქართველოს პირველი პირის გიორგი მარგველაშვილის კონტაქტი არ იგეგმება.

“რაც შეეხება უფრო მაღალი დონის კონტაქტებს, რამდენადაც ჩემთვის ცნობილია, ამ ეტაპზე ასეთი შეხვედრები არ იგეგმება”, - აღნიშნა გრიგორი კარასინმა.

ცნობისთვის, როგორც რუსული მედია აღნიშნულ ინტერვიუში წერს, ქართულმა მხარემ რუსეთთან დიპლომატიური ურთიერთობა 2008 წლის აგვისტოს ომის შემდეგ გაწყვიტა. რუსული მედიის ინფორმაციით, საქართველოს ახალმა ხელისუფლებამ, ერთ-ერთ მთავარ პრიორიტეტად რუსეთთან ურთიერთობების ნორმალიზება დაასახელა.