ნარმანია: ბარნოვის ქუჩის რეაბილიტაციით დედაქალაქს ერთ დამატებით პროექტს ვაჩუქებთ

2016-07-30 13:15:24, 773 ნახვა

საზოგადოება

თბილისის მერმა დავით ნარმანიამ ბარნოვის ქუჩაზე სარეაბილიტაციო სამუშაოები დაათვალიერა.

როგორც დავით ნარმანიამ განაცხადა, ბარნოვის ქუჩაზე გზის კაპიტალური შეკეთება მიმდინარე წლის ივლისში დაიწყო და 80 დღეში დასრულდება.

მერის თქმით, სამუშაოები სექტემბრის დასაწყისში დასრულდება.

”ეს არის ძალიან მნიშვნელოვანი სამუშაოები, ბარნოვის ქუჩას დიდი ხანია საგზაო ინფრასტრუქტურის გაუმართაობიდან გამომდინარე პრობლემები ჰქონდა. ზაფხულის განმავლობაში ინტენსიურად ვიმუშავებთ და სექტემბრის შუა რიცხვებამდე, სანამ ქალაქი მთლიანად დაიტვირთება, საგზაო სამუშოები უნდა იყოს შესრულებული და ამით კიდევ ერთ დამატებით პროექტს ვაჩუქებთ დედაქალაქს”, - განაცხადა დავით ნარმანიამ.

გზის კაპიტალური შეკეთების ფარგლებში, ასფალტო-ბეტონის საფარის მოწყობა ბარნოვი - მაყაშვილის კვეთიდან ბარნოვი - ჭოველიძის კვეთამდე მიმდინარეობს. მიმდინარე სამუშაოების გამო მოძრაობა მაყაშვილის ქუჩის კუთხიდან ზანდუკელის ქუჩის კუთხემდე და ტატიშვილის ქუჩის კუთხიდან პეტრიაშვილის ქუჩის კვეთამდე დროებით შეზღუდულია.