რუსეთი გიგა ოთხოზორიას მკვლელობაზე პასუხისმგებლობას აფხაზეთს აკისრებს

2016-05-26 22:10:15, 578 ნახვა

პოლიტიკა

რუსეთი გიგა ოთხოზორიას მკვლელობაზე პასუხისმგებლობას აფხაზურ მხარეს აკისრებს.

რუსული მედიის ინფორმაციით, მომხდართან დაკავშირებით განცხადება რუსეთის საგარეო საქმეთა სამინისტროში გაკეთდა.

როგორც რუსული მედია იუწყება, სერგეი ლავროვის უწყების ოფიციალური წარმომადგენლის, მარია ზახაროვას განცხადებით, ინციდენტი იმ ზონაში მოხდა, რომელზეც პასუხისმგებლობა აფხაზურ მხარეს ეკისრება. მისივე თქმით, მომხდართან რუს მესაზღვრეებს ირიბი შეხებაც არ ჰქონიათ.

„აფხაზეთის საზღვარზე საქართველოს მოქალაქის, გიგლა ოთხოზორიას მკვლელობასთან რუსეთს კავშირი არ აქვს. რამდენადაც ჩვენ ვიცით, კონფლიქტი აფხაზი მესაზღვრეების პასუხისმგებლობის ზონაში წარმოიქმნა და რუსულ მხარეს მასთან ირიბი შეხებაც არ ჰქონია“, - განაცხადა რუსეთის საგარეო საქმეთა სამინისტროს პრესსპიკერმა.

ზახაროვას განცხადებით, საქართველო და რუსეთი დიპლომატიური ურთიერთობის არქონას განიცდიან.

„საქართველო-რუსეთს შორის ურთიერთობაში არსებობდა სხვადასხვა ეტაპები როგორც პოზიტიური, ისე ნეგატიური. იყო მჭიდრო კონტაქტების წლებიც, მაგრამ სამწუხაროდ, გადაუწყვეტელი პრობლემების გამო საქართველო და რუსეთი განიცდის დიპლომატიური ურთიერთობების არქონას. ამის მიუხედავად, ადამიანებს შორის კონტაქტები არასოდეს შეწყვეტილა“, - განაცხადა ზახაროვამ.