პარიზში „საქართველოს ევროპული გზების“ პრეზენტაცია გაიმართება

2016-03-24 10:40:49, 592 ნახვა

საზოგადოება

ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე სამუშაო ვიზიტით საფრანგეთში, პარიზში გაემგზავრა, სადაც დაგეგმილია სახელმწიფო მინისტრის ორმხრივი შეხვედრები ევროპულ საქმეთა გენერალურ მდივანთან ეგლიზ კოსტასთან, საგარეო საქმეთა სამინისტროს პოლიტიკურ დირექტორთან ნიკოლა დე რივიერთან დაევროპულ საქმეთა სახელმწიფო მდივანთან არლემ დეზირთან.

როგორც „ექსპრესნიუსს“ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატიდან აცნობეს, პარიზის საერთაშორისო დიპლომატიურ აკადემიაში, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ინიციატივით გამოცემული წიგნის „საქართველოს ევროპული გზები“ პრეზენტაცია გაიმართება.

მათივე ინფორმაციით, ღონისძიებას საფრანგეთში აკრედიტებული პარტნიორი ქვეყნების საელჩოების დიპლომატები, რეგიონის მკვლევარები, ჟურნალისტები, სტუდენტები, დოქტორანტებიდა ქართული დიასპორის წარმომადგენლები დაესწრებიან. მოწვეული სტუმრების წინაშე კრებულის შესახებ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე, მწერალი და წიგნის რედაქტორი ზურაბ ქარუმიძე და წიგნის ერთ-ერთი თანაავტორი, ხელოვნებათმცოდნე ქეთევან კინწურაშვილი ისაუბრებენ.