ბათუმი, ქუთაისი, გორი, ფოთი, რუსთავი, ახალციხე, ბორჯომი, ზუგდიდი - საქართველო საპროტესტო აქციებმა მოიცვეს

2024-12-01 20:59:35, 427 ნახვა

პოლიტიკა

ბათუმში საპროტესტო აქციაზე დაკავებულებს – ალბერტ არაქელოვს, ლაშა ფალავანდიშვილს, ვლადიმერ თოდაძეს და ნოდარ მამულაძეს ბათუმის საქალაქო სასამართლოს მოსამართლემ, ხათუნა ბოლქვაძემ 5 დღიანი პატიმრობა შეუფარდა, ნათია ნონიაიანა კი 2000 ლარით დააჯარიმა. სასამართლო პროცესი მასშტაბური პროტესტის ფონზე გრძელდება.

დაკავებულებს ედავებიან ადმინისტრაციული კოდექსის 166-ე მუხლის პირველი და 173-ე მუხლის პირველი ნაწილის დარღვევას, რაც წვრილმან ხულიგნობას და საზოგადოებრივ წესრიგისა და სიმშვიდის დარღვევას გულისხმობს და გამოიწვევს დაჯარიმებას 500 ლარიდან 1000 ლარამდე ოდენობით ან ადმინისტრაციულ პატიმრობას 15 დღემდე ვადით.

173-ე მუხლი კი პოლიციელის კანონიერი მოთხოვნის მიმართ დაუმორჩილებლობას გულისხმობს და ჯარომის თანხა კიდევ უფრო იზრდება.

29 ნოემბერს ბათუმში საპროტესტო აქციაზე 9 პირი დააკავეს, მათ შორის – არასრულწლოვანი და ერთი ქალი. მოგვიანებით არასრულწლოვანი და ქალი გაათავისუფლეს.

გორში ადმინისტრაციული შენობის წინ რამდენიმე ათეული ადამიანი გამოვიდა. როგორც ისინი აღნიშნავენ, ბევრი მათგანი თბილისში მიმდინარე საპროტესტო აქციებზე იმყოფება.
,,მე და ჩემი თანატოლები გამოვედით იმისათვის, რომ ვისწავლოთ ევროპაში. არ მიმაჩნია სწორად, რომ მთავრობა და პოლიცია ძალადობს და ხელს უშლის ხალხს თავის აზრის გამოხატვაში'' - ამბობს მოსწავლა ნატალი მახარაშვილი
,,იმის მიუხედავად, რომ გორში ცოტა ხალხი გამოდის აქციაზე. თბილისში მე ძალიან ბევრი გორელი პედაგოგი, საჯარო მოხელე ვნახე თბილისის აქციაზე.'' - ნანა ტერმაკოზაშვილი

ბორჯომის ქალაქის ცენტრში საპროტესტო აქცია გაიმართება. სახელწოდებით ვიცავთ, ჩვენი ქვეყნის ევროპულ მომავალს.

ერთ-ერთმა ადგილობრივმა გიორგი ოგანესიანმა ადგილობრივებისთვის მიართვა ჩაწერა.

„ამ ვიდეოს ვწერ ჩემი თანაქალაქელებისთვის და განსაკუთრებით ვწერ ჩემი მასწავლებლებისთვის. ბაღში, სკოლასა თუ რეპეტიტორების ასაკში, მასწავლიდნენ სამშობლოს სიყვარულს საკუთარი მაგალითებით. მათ შორის მათი ნაწილი 9 აპრილის მონაწილეები არიან. მათ საკუთარი სიცოცხლის და ჯანმრთელობის ფასად უწევდათ ქვეყნის დამოუკიდებლობის დაცვა. ისინი ყოველთვის მასწავლიდნენ, რომ ღალატი და ორპირობა მიუღებელია. არაკაცური, არა ქრისტიანული და არა ადამიანური წაქცეულ ადამიანს შეეხო და დაარტყა“,- ამბობს გიორგი.

მისივე თქმით „შესაბამისად, მე მინდა ჩვენი ხმა გავაგონოთ მთელს საქართველოს, ბორჯომში მჯერა, რომ არსებობს ის დემოკრატიული, ის პატრიოტული, ის ქართული, ის კაცური მუხტი, რომელსაც შეუძლია ხმამაღლა უარი უთხრას ნებისმიერ ძალადობას“,-თქვა მან მოქალაქეების აქციაზე გამოსვლისკენ მოუწოდა.

ახალციხეში შოთა რუსთაველის ძეგლთან საპროტესტო აქცია გაიმართა.

„სანამ, ჯერ კიდევ შეგვიძლია პროტესტის გამოხატვა, გამოდით!
აქამდე, ამბობდნენ ევროპაში მიგვყავს ქვეყანაო, მაგრამ საქმით სხვა რამეს სჩადიოდნენ. ახლა სიტყვითაც გააცხადეს! წლების წინ, ვითომ პატივს სცემდნენ სამოქალაქო სექტორს და ჟურნალისტებს, მაგრამ ე.წ აგენტების კანონით, მათი დისკრედიტაცია გააცხადეს!
ამბობენ, რომ მოქალაქეების პროტესტის გამოხატვის უფლება დაცულია, მაგრამ სინამდვილეში, სასტიკად უსწორდებიან, სცემენ და იჭერენ! შორს არ არის ის დრო, ამასაც ღიად რომ გააცხადებენ სიტყვით, თორემ ქმედებას ისედაც ცხადად ვხედავთ!
ყველას და ყველაფერს შეეხება ეს ძალა და ცოდოა ეს ქვეყანა! ცოდოები ვართ ჩვენ, ყველა! ვისაც არაფერი უნდა, გარდა თავისუფლებისა და იმისა, რომ საკუთარი შრომით, აშენოს ეს ქვეყანა!
ვიცი, რომ ბევრს შესტკივა გული ახალციხეში და იმაზე ბევრად მეტნი ვართ, ვიდრე ეს აქციაზე ჩანს ხოლმე! აღარ არის ერთმანეთის ყურების და თვალ-ყურის ახვევის დრო!
ეს რეალურად ხდება და სანამ დროა, უნდა ავჯანყდეთ!“ ნათქვამია განცხადებაში.

ანტიევროპულ გადაწყვეტილებას ზუგდიდში უკვე მე-4 დღეა აპროტესტებენ. მოქალაქეები გუბერნიის შენობასთან არიან შეკრებილები, შემდეგ კი ცენტრალურ ქუჩებში მსვლელობას გამართავენ.

აქციის მონაწილეები ქვეყნის საგარეო კურსის ცვლილებას აპროტესტებენ და ამბობენ, რომ საქართველოს მომავალი ევროპაშია.

აქციას პედაგოგების დიდი ნაწილი შეუერთდა.

გარდა ამისა, ფოთის პორტის ერთ-ერთ ტერმინალში შესასვლელი გზა გადაკეტილია. ადგილზე შეკრებილები ითხოვენ, რომ უნდა ხელისუფლებამ ევროატლანტიკურ სივრცეში ინტეგრაციის პროცესი უზრუნველყოს.