მედიაომბუდსმენი - მოვუწოდებთ შსს-ს, მედიასა და აქციის მონაწილეებზე ძალადობა შეაჩეროს

2024-11-19 10:46:06, 393 ნახვა

საზოგადოება

მოვუწოდებთ შინაგან საქმეთა სამინისტროს, შეაჩეროს მედიასა და აქციის მონაწილეებზე ძალადობა,- ამის შესახებ ნათქვამია განცხადებაში, რომელსაც მედიაომბუდსმენი ავრცელებს.

მედიაომბუდსმენი ასევე მიმართავს სპეციალურ საგამოძიებო სამსახურს და გამოძიების დაუყოვნებლივ დაწყებისკენ მოუწოდებს.

„ჟურნალისტების და ოპერატორების დევნის და დაკავების შეტყობინებებით მედიაომბუდსმენმა სპეციალური საგამოძიებო სამსახურს მიმართა

დღეს, 19 ნოემბერს სპეცდანიშნულების წევრები ჟურნალისტურ საქმიანობაში ხელს უშლიდნენ OC Media-ს ჟურნალისტს, მარიამ ნიკურაძეს; სამართალდამცველები გადაღების შესაძლებლობას არ აძლევდნენ Netgazeti-ის კორესპონდენტს, გივი ავალიანს; ჟურნალისტური საქმიანობის შესრულების პროცესში დააკავეს „მთავარი არხის“ოპერატორი სერგი ბარამიძე; სამართალდამცველებმა ფიზიკური შეურაცხყოფა მიაყენეს „პუბლიკას“ ჟურნალისტს, მინდია გაბაძეს.

მოვუწოდებთ შინაგან საქმეთა სამინისტროს, შეაჩეროს მედიასა და აქციის მონაწილეებზე ძალადობა.

მოვუწოდებთ სპეციალურ საგამოძიებო სამსახურს, დაუყოვნებლივ დაიწყოს გამოძიება სახელმწიფოს წარმომადგენლების მიერ ჩადენილ დანაშაულებთან დაკავშირებით“,- ნათქვამია მედიაომბუდსმენის განცხადებაში.