საქართველოს საგარეო საქმეთა მინისტრი, მიხეილ ჯანელიძე დუბრავკა სიმონოვიჩს შეხვდა

2016-02-15 22:07:48, 491 ნახვა

პოლიტიკა

საქართველოს საგარეო საქმეთა მინისტრი, მიხეილ ჯანელიძე ქალთა მიმართ ძალადობის, მისი მიზეზებისა და შედეგების საკითხებზე გაერო-ს სპეციალურ მომხსენებელს, დუბრავკა სიმონოვიჩს შეხვდა.

შეხვედრაზე განხილულ იქნა საქართველოში ადამიანის უფლებების, კერძოდ ქალთა უფლებების დაცვის კუთხით არსებული მდგომარეობა და ქვეყნის წინაშე მდგარი გამოწვევები. ქართულმა მხარემ სპეციალურ მომხსენებელს გააცნო ადამიანის უფლებების სფეროში საქართველოს მიერ გადადგმული ნაბიჯები და სამომავლო გეგმები. საუბარი შეეხო საქართველოს მთავრობის მიერ დამტკიცებულ სტრატეგიას და შესაბამის სამოქმედო გეგმას. შეხვედრის ფარგლებში სპეციალური მომხსენებელი მიესალმა საქართველოს გაწევრიანებას გაერო-ს ადამიანის უფლებათა საბჭოში, ასევე აღნიშნა ქართველი ექსპერტის წევრობა ქალთა მიმართ დისკრიმინაციის აღმოფხვრის კომიტეტში.

შეხვედრაზე ყურადღება გამახვილდა საქართველოს ოკუპირებულ რეგიონებში ადამიანის უფლებათა დაცვის კუთხით არსებულ მდგომარეობაზე, სადაც ყოველდღიურად უხეშად ირღვევა ადგილობრივი მოსახლეობის ფუნდამენტური უფლებები და სამწუხაროდ ვერ ხორციელდება საერთაშორისო მონიტორინგი.

დუბრავკა სიმონოვიჩის ვიზიტი არის ქალთა მიმართ ძალადობის, მისი მიზეზებისა და შედეგების საკითხებზე გაერო-ს სპეციალური მომხსენებელის პირველი ოფიციალური ვიზიტი, რომელიც 15 თებერვალს დაიწყო და 19 თებერვლამდე გაგრძელდება. ვიზიტის ფარგლებში სპეციალური მომხსენებელი შეხვდება აღმასრულებელი, საკანონმდებლო და სასამართლო ხელისუფლების წარმომადგენლებს, ასევე სამოქალაქო საზოგადოებას და სახალხო დამცველს. განხორციელებული ვიზიტის საფუძველზე სპეციალური მომხსენებელი საქართველოს შესახებ მოამზადებს ანგარიშს, რომელსაც 2016 წლის ივნისში გაერო-ს ადამიანის უფლებათა საბჭოს 32-ე სესიის ფარგლებში წარუდგენს.