შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი აშშ-ის დაზვერვის ეროვნული სამსახურის ყოველწლიურ ანგარიშში საქართველოში არსებული ვითარების შეფასებას ეხმაურება.

ზაქარეიშვილის მტკიცებით, საქართველოს პოლიტიკას დასავლეთის მიმართულებით, საფრთხე არ ემუქრება.

"აბსოლუტური პასუხისმგებლობით შემიძლია გითხრათ, რომ არანაირი საფრთხე არ გააჩნია საქართველოს მთავრობის პოლიტიკას იმ კურსის მიმართ, რაც თანმიმდევრულად აქვს აღებული დასავლეთის მიმართ ევროპული თუ ევროატლანტიკური ინტეგრაციის კუთხით. ეს კიდევ ერთხელ დაადასტურა პრემიერმინისტრის ვიზიტმა ბრიუსელში. მე გამიჩნდა განცდა, რომ სწორედ აშშ, როგორც ჩვენი ყველაზე ერთგული და მართლაც მკაფიო მეგობარი, მხარს უჭერს საქართველოს ღირებულებებზე დაფუძნებულ ჩვენს პოლიტიკას. მე ამას ვგრძნობ. ცოტა ხნის წინ აშშ-ში ვიყავი და ეს მხარდაჭერა, ეს დამოკიდებულება ნამდვილად ვიგრძენი. ეს სწორედ იმ დახმარების გაგრძელებაა, რაც ამდენხანს იყო. ბუნებრივია ეს არის საქართველოს პოლიტიკის გაძლიერება, იმ პოლიტიკის გაძლიერება, რომელსაც ჩვენი ქვეყანა სამი წელია თანმიმდევრულად მისდევს სწორედაც, რომ დაალაგოს ურთიერთობა რუსეთთან, არ იყოს კომფრონტაციის მიზეზი. სამმა წელმა აშკარად გვაჩვენა, რომ ვითარება განიმუხტა. თუმცა, ვითარება რთულია. გავითვალისწინოთ რა ხდება მსოფლიოში და ჩვენს გარშემო, ეს არის გაძლიერება იმ ქართული პოლიტიკის, რომელმაც წარმატებული შედეგები მოიტანა“, - განაცხადა პაატა ზაქარეიშვილმა.

ქვეყანამ ევროატლანტიკური ინტეგრაციის მიმართულებით ძალისხმევა შესაძლოა შეაჩეროს, - ამის შესახებ ამერიკის დაზვერვის სამსახურის ხელმძღვანელმა, ჯეიმს კლეპერმა სენატში განაცხადა. აშშ-ს ეროვნული დაზვერვის სამსახური თავის ოფიციალურ გვერდზე დაზვერვის სამსახურის ხელმძღვანელის, ჯეიმს კლეპერის ანგარიშს აქვეყნებს, სადაც მსოფლიო საფრთხეებზეა საუბარი. თუმცა, აღნიშნულ დოკუმეტში საქართველოზეცაა საუბარი. „დასავლური ინტეგრაციის ნელი ტემპის გამო, ქართულ ელიტასა და საზოგადოებას შორის მზარდი იმედგაცრუება და სულ უფრო მეტი ეფექტური რუსული პროპაგანდა, ქმნის იმის პერსპექტივას, რომ თბილისმა უფრო მასშტაბური ევროატლანტიკური ინტეგრაციის მიმართულებით ძალისხმევა შესაძლოა შეასუსტოს, ან შეაჩეროს. რუსეთთან დაძაბულობა კვლავ მაღალ დონეზე დარჩება და ჩვენი შეფასებით, მოსკოვი ზეწოლას გაზრდის თბილისზე, რომ ევროკავშირსა და NATO-სთან ახლო ურთიერთობებზე უარი თქვას", - აღნიშნულია დოკუმენტში.

როგორც კლეპერმა განმარტა, მიზეზად რუსეთის პროპაგანდა და ზეწოლის მოსალოდნელი ზრდა არის. კლეპერის თქმით, "მიუხედავად იმისა, რომ საქართველო რეფორმების კუთხით წარმატებას აღწევს, ქართული პოლიტიკა, პოლიტიკური კონკურენციის ზრდის ფონზე, უდაოდ ცვალებადი იქნება. ეკონომიკური ცვლილებები 2016 წლის არჩევნების წინ, მთავრობისთვის, სავარაუდოდ მთავარი პოლიტიკური სისუსტე გახდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ALDE-მ საქართველოს შესახებ რეზოლუცია მიიღო

ავსტრიის საგარეო მინისტრი - ეს არ არის ბაზარი, სადაც თქვენს მთავრობას შეეძლო ევაჭრა, დაეწყო ჩვენთან მოლაპარაკება და ჩვენ შეგვესუსტებინა ჩვენი პოზიცია ფუნდამენტურ ღირებულებებზე - ეს, არასდროს მოხდება

ზელენსკი კონსტანტინოვკის აღებაზე - სიმართლე ძალიან განსხვავდება პუტინის სიტყვებისგან

უკრაინამ რუსეთის ბალტიის ფლოტს დაარტყა