კრემლი უკრაინაში წამოწყებული საომარი მოქმედებების დასრულების ორ გზას ხედავს - მიზნების მიღწევით ან მოლაპარაკებით. ამის შესახებ ინფორმაციას რუსული პროპაგანდისტული მედია RIA Novosti ავრცელებს. 

როგორც რუსეთის პრეზიდენტის პრესმდივანმა, დიმიტრი პესკოვმა განაცხადა, ე.წ "სპეციალური ოპერაციის" მიზნების მიღწევა მშვიდობიანი მოლაპარაკებების გზითაც შესაძლებელია, თუმცა უკრაინული მხარის პოზიციიდან გამომდინარე ეს "შეუძლებელია". 

„კონფლიქტი უკრაინაში - მე ამ შემთხვევაში ვიტყოდი, რომ ჩვენი გადმოსახედიდან, უკრაინაში სპეციალური სამხედრო ოპერაცია შეიძლება მიზნების მიღწევის შემდეგ დასრულდეს.

ან დასრულდეს მშვიდობიანი მოლაპარაკებების გზით მიზნების მიღწევით, რაც ასევე შესაძლებელია, მაგრამ, როგორც ვიცით, უკრაინული მხარის პოზიციიდან გამომდინარე მშვიდობიანი მოლაპარაკება შეუძლებელია“,- განაცხადა პესკოვმა. 

ცნობისთვის, რუსეთის მიერ უკრაინაში სრულმასშტაბიანი ომის დაწყების შემდეგ, ორ ქვეყანას შორის მოლაპარაკების რამდენიმე უშედეგო რაუნდი გაიმართა.

30 სექტმებერს, მას შემდეგ, რაც რუსეთის პრეზიდენტმა უკრაინის ოთხი ოკუპირებული რეგიონის ანექსიის შესახებ განკარგულებას ხელი მოაწერა, ვლადიმერ პუტინმა კრემლში გამართულ ცერემონიაზე, უკრაინელებს მოლაპარაკების მაგიდასთან დასხდომისკენ მოუწოდა. 

პუტინმა მაშინ განმარტა, რომ ორმხრივი მოლაპარაკების შემთხვევაში, რუსეთი უკრაინასთან მის შემადგენლობაში შესული ტერიტორიების შესახებ აღარ ისაუბრებდა, რადგან ხალხმა "თავისი არჩევანი უკვე გააკეთა".

30 სექტემბერს, უკრაინის პრეზიდენტმა, ვოლოდიმირ ზელენსკიმ დაამტკიცა ეროვნული უშიშროებისა და თავდაცვის საბჭოს გადაწყვეტილება, რომლის თანახმადაც, უკრაინა რუსეთის ფედერაციის პრეზიდენტთან მოლაპარაკებებს ვერ აწარმოებს.

ოქტობრის ბოლოს, რუსეთის საგარეო საქმეთა მინისტრმა, სერგეი ლავროვმა განაცხადა, რომ ვლადიმერ პუტინი უკრაინასთან მოლაპარაკებებისთვის კვლავაც მზად იყო. თუმცა, უკრაინის პრეზიდენტის ოფისის მრჩეველმა, მიხაილო პოდოლიაკმა თქვა, რომ უკრაინა მოლაპარაკებებს მხოლოდ რუსეთის ფედერაციის მომავალ ლიდერთან გამართავს.

ავტორი: ექსპრესნიუსი,

სოციალური ქსელები

მთავრობამ რუსეთიდან დიზელის საწვავის ექსპორტი აკრძალა, ბენზინისა და თვითმფრინავის საწვავის შემდეგ

ნატოს ქვეყნები ორი წლის განმავლობაში უკრაინას 140 მილიარდი ევროს ოდენობის დახმარება გამოუყოფენ

ყოფილმა მთავარსარდალმა ზალუჟნიმ მოსაზრებას, რომ რუსეთმა ომი წააგო, „სახიფათო და არასწორი“ უწოდა

სააპელაციომ მკვლელობის მცდელობაში ბრალდებულს 17 წლით პატიმრობა მიუსაჯა