2021-09-01 18:29:32, 361 ნახვა

---

პრემიერი - იმისთვის, რომ მავნებლებს არ მივცეთ ქვეყნის არევის საშუალება, ერთადერთი გზა არის დემოკრატიული არჩევნები, რომელიც „ქართული ოცნების" ხელისუფლების პირობებში გარანტირებული

ჩემი დავალებით, მთავრობამ შეიმუშავა გრძელვადიანი განვითარების ხედვები ყველა სექტორის მიმართულებით, იქნება ეს სოფლის მეურნეობა, ადგილობრივი წარმოების განვითარება, ინფრასტრუქტურა, რეგიონების განვითარება, - ამის შესახებ საქართველოს პრემიერ-მინისტრმა ირაკლი ღარიბაშვილმა „ქართული ოცნების" სამტრედიის მერობის კანდიდატის დავით ბახტაძის წარდგენისას განაცხადა.

მთავრობის მეთაურის თქმით, მმართველ გუნდს აქვს მკაფიოდ ჩამოყალიბებული ხედვა და გეგმა, რა უნდა გააკეთოს, რამდენ ხანში, როდის და როგორ.

„ამისთვის, მეგობრებო, საჭიროა სტაბილურობის შენარჩუნება. იმისთვის, რომ ამ მავნებლებს არ მივცეთ ქვეყნის არევის საშუალება, ერთადერთი გზა, რა თქმა უნდა, არის დემოკრატიული არჩევნები, რომელიც "ქართული ოცნების" ხელისუფლების პირობებში არის გარანტირებული და ჩვენ უკვე 7 დემოკრატიული, თავისუფალი, გამჭვირვალე არჩევნები ჩავატარეთ თქვენთან ერთად და გავიმარჯვეთ დამაჯერებლად. ახლა საჭიროა, მერვე არჩევნებში ღირსეულად გავიმარჯვოთ იმისთვის, რომ მომდევნო სამი წელი იყოს სწრაფი განვითარების, მუშაობის, აღმშენებლობის წლები,  აი, ეს უნდა იყოს ჩვენი მთავარი ამოცანა. გვაქვს სერიოზული გეგმები სოფლის მეურნეობის მიმართულებით, როგორც გითხარით, გვინდა, რომ გავაფართოოთ, მაქსიმალურად, მთელი ქვეყანა უნდა მოვიცვათ იმისთვის, რომ სიღარიბე დავძლიოთ, იმისთვის, რომ ყველა ოჯახში შევიტანოთ სიკეთე და კეთილდღეობა. 7 მილიარდი ლარის მობილიზებას ვგეგმავთ მომდევნო წლების განმავლობაში იმისთვის, რომ რეალურად ფეხზე დავაყენოთ სოფელი. ადგილობრივი წარმოების მიმართულება იქნება ეს  თუ სხვა, მაგალითად იგივე რეალური ეკონომიკის განვითარების მიზნით, ადგილობრივი წარმოების განვითარების მიზნით, 2 მილიარდ 500 მილიონი ლარის ინვესტიციას ვგეგმავთ.  1000-ზე მეტი ახალი საწარმოს დაფინანსება იგეგმება ამ თანხებით და დამატებით 100 ათასი სამუშაო ადგილი შეიქმნება ჩვენს ქვეყანაში მინიმუმ. რა თქმა უნდა, ეს გადანაწილდება ყველა რეგიონის მიხედვით, გვაქვს შესწავლილი ყველა რეგიონის პოტენციალი, ყველა მუნიციპალიტეტის ტურისტული პოტენციალი, ადგილობრივი წიაღისეულის რესურსების პოტენციალი, რაც მაქსიმალურად იქნება ათვისებული და  გამოყენებული გონივრულად", - აღნიშნა პრემიერ-მინისტრმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი