პარლამენტმა ცესკო-ს თავმჯდომარე და ორი პროფესიონალი წევრი 100 ხმით კვლავ ვერ აირჩია

2021-07-22 13:06:54, 929 ნახვა

პოლიტიკა

პრეზიდენტის მიერ პარლამენტისთვის წარდგენილი ცენტრალური საარჩევნო კომისიის თავმჯდომარეობის და წევრობის კანდიდატებმა პარლამენტისგან საკმარისი მხარდაჭერა ვერ მოიპოვეს.

რიგგარეშე სესიის პლენარულ სხდომაზე გამართული კენჭისყრის შედეგად, ცენტრალური საარჩევნო კომისიის თავმჯდომარის თანამდებობაზე წარდგენილი გიორგი კალანდარიშვილის კანდიდატურა 82-მომხმით, 8-ის წინააღმდეგ ვერ გავიდა, ხოლო ცენტრალური საარჩევნო კომისიის თავმჯდომარის თანამდებობაზე ასარჩევად წარდგენილ მეორე კანდიდატურას, გიორგი სანტურიანს მხარი მხოლოდ ორმა დეპუტატმა დაუჭირა. მის წინააღმდეგ კი ხმა პარლამენტის ათმა წევრმა მისცა.

ცენტრალური საარჩევნო კომისიის წევრობის ერთ ვაკანტურ თანამდებობაზე წარდგენილ გია ცაცაშვილს მხარი 80 დეპუტატმა 9-ის წინააღმდეგ დაუჭირა, ლელა ტალიურის კანდიდატურას კი - 16-მა 1-ის წინააღმდეგ.

ცესკო-ს წევრობის მეორე ვაკანტურ თანამდებობაზე წარდგენილი იყო მაია ზარიძის და თამარ სართანიას კანდიდატურები, რომელთაც ასევე ვერ მოაგროვეს ხმების საკმარისი რაოდენობა.

მაია ზარნაძეს მხარი პარლამენტის 81-მა წევრმა დაუჭირა 8-ის წინააღმდეგ, ხოლო თამარ სართანიას - 16-მა 27-ის წინააღმდეგ.

საარჩევნო კანონმდებლობაში განხორციელებული ცვლილებებით, ცესკოს თავმჯდომარისა და წევრების არჩევას 100 ხმა სჭირდება.