ოპოზიციურმა პარტიებმა ხელი მოაწერეს შეთანხმებას, რომლის თანახმად „ქართულ ოცნებას“ კოალიციურ მთავრობას არ შეუქმნიან

2020-10-30 13:10:06, 556 ნახვა

პოლიტიკა

ოპოზიციურმა პარტიებმა ხელი მოაწერეს შეთანხმებას, რომლის თანახმად „ქართულ ოცნებას“ და მასთან ასოცირებულ პოლიტიკურ პარტიებს კოალიციური მთავრობას არ შეუქმნიან.

ამის შესახებ ოპოზიციური პარტიების ერთობლივ განცხადებაშია აღნიშნული.

ქვემორე ხელმომწერი პარტიები ვაცნობიერებთ რა, რომ ბიძინა ივანიშვილის რვაწლიანმა ოლიგარქიულმა მმართველობამ:

მნიშვნელოვნად დაასუსტა საქართველოს დემოკრატიული ინსტიტუტები, ძალაუფლების ერთ-პიროვნული და უკონტროლო კონცენტრაციით, სახელმწიფო ინსტიტუტების პოლიტიზირებით და დემოკრატიული ანგარიშვალდებულების მექანიზმების სრული მორღვევით; მათ შორის, სასამართლო სისტემის პოლიტიზირებით და პოლიტიკური დევნის ინსტრუმენტად გამოყენებით;
ჩრდილი მიაყენა საქართველოს საერთაშორისო რეპუტაციას და შეაფერხა ქართველი ხალხის ისტორიული ევროპული არჩევანის განხორციელების შესაძლებლობას, მათ შორის ევრო-ატლანტიკურ სტრუქტურებში გაწევრიანების პროცესში;
ზიანი მიაყენა საქართველოს სტრატეგიულ ეკონომიკურ პერსპექტივებს, მათ შორის ანაკლიის ღრმაწყლოვანი პორტის მშენებლობის შეჩერებით და დასავლელი ინვესტორების პროექტიდან ხელოვნურად ჩამოშორებით;
„ნორმალიზების პოლიტიკის“ საფარქვეშ შეასუსტა საქართველოს სამომლაპარაკებლო პოზიცია რუსეთის ფედერაციასთან დეოკუპაციის საკითხებზე საქართველოს ეროვნული ინტერესების დათმობით;

ვაცხადებთ, რომ 2020 წლის 31 ოქტომბრის საპარლამენტო არჩევნების შედეგად, არც ერთ მოცემულობაში, არ შევუქმნით კოალიციურ მთავრობას ბიძინა ივანიშვილის ქართულ ოცნებას.

პოლიტიკური ოპოზიცია დარწმუნებულია, რომ ქართველი ხალხის ნებით 31 ოქტომბრის საპარლამენტო არჩევნებში მოიპოვებს დამაჯერებელ გამარჯვებას და მოახდენს ქართველი ხალხის ნდობით აღჭურვილი მთავრობის ფორმირებას ქვეყნის საკეთილდღეოდ“, - აღნიშნულია განცხადებაში.

ხელმომწერი პარტიები:

გიორგი ვაშაძე - „სტრატეგია აღმაშენებელი“

ზურაბ გირჩი ჯაფარიძე - „გირჩი“

სერგი კაპანაძე - „ევროპული საქართველო“

მამუკა გამყრელიძე - „ევროპელი დემოკრატები“

თამარ ჩარკვიანი - „კანონი და სამართალი“ – „სტრატეგია აღმაშენებელი“

ირაკლი ოქრუაშვილი - „გამარჯვებული საქართველო“

ანზორ ბიწაძე - „ნინო ბურჯანაძე - ერთიანი საქართველო“

ხათუნა სამნიძე - „რესპუბლიკური პარტია“

თინა ბოკუჩავა - „ერთიანი ნაციონალური მოძრაობა“

ნატო ჩხეიძე - მოძრაობა „სახელმწიფო ხალხისთვის“

შალვა ნათელაშვილი - „ლეიბორისტული პარტია“.