„ჩაინა ლილო სითის“ მფლობელი ხანძრის განზრახ გაჩენას არ გამორიცხავს

2019-06-07 12:21:49, 911 ნახვა

საზოგადოება

„ჩაინა ლილო სითის“ მფლობელი, ლაურა ღაჭავა ხანძრის განზრახ გაჩენას არ გამორიცხავს.

როგორც მან ჟურნალისტებს განუცხადა, მტრები ჰყავს და არ არის გამორიცხული მომხდარი სწორედ მისთვის ზიანის მიყენებას უკავშირდებოდეს.

ამასთან, ის ითხოვს, ტერიტორიაზე საიდანაც ცეცხლი პირველად გაჩნდა ვიდეო- სათვალთვალო კამერების დალუქვა მისი თანდასწრებით მოხდეს.

„იქ არც შუქი ყოფილა და არც არაფერი არ ყოფილა და უკვე ეჭვი მეპარება რაღაცეებზე. მეპატრონე ჩინელებმა ახლა მომაწოდეს, რომ საწყობიდან გაჩენილა. საწყობი იყო დაკეტილი, შუქი არ არის, არაფერი არ არის. დაკეტილი იყო და საიდან ცეცხლი მითხარით? ვინმემ ხომ არ შეაგდო რაღაცა. ამას ვერ ვამბობ ჯერ ვინ, ძალიან ბევრი მტერი მყავს. ვიღაცას ხელს ვუშლი“, - განაცხადა ლაურა ღაჭავამ.

შეგახსენებთ, რომ ლილოში, ე.წ. ჩინურ ბაზრობაზე, ცეცხლი დაახლოებით 23:00 საათისთვის გაჩნდა. დამწვარია ათას კვადრატულ მეტრამდე ფართი და ათობით მაღაზია. ცეცხლის ჩაქრობას 90-მდე მეხანძრე-მაშველი ცდილობდა.