ე.წ. მესაზღვრეებმა სოფელ ახმაჯთან 2 ადამიანი დააკავეს

2017-10-31 11:37:06, 965 ნახვა

რეგიონი

ოკუპირებული ახალგორის ტერიტორიაზე, სოფელ ახმაჯის სიახლოვეს ოკუპანტებმა საქართველოს 2 მოქალაქე გაიტაცეს, - ამის შესახებ "სპუტნიკ-ოსეტია" იუწყება.

მედია საშუალების ინფორმაციით, დაკავებულები არიან კასპის რაიონის სოფელ ოკამის მკვიდრები, 43 წლის ჯონი თათარაშვილი და 20 წლის გიორგი შუკაკიძე.

მედიის ცნობით, დაკავებულები ახალგორის მილიციის შენობაში იმყოფებიან, თუმცა მათი ცხინვალის იზოლატორში გადაყვანა იგეგმება. გარდა ამისა, დე-ფაქტო სასაზღვრო სამსახური გამოძიებას ახორციელებს და მოძიებული მასალების სასამართლოში გადაგზავნას გეგმავს.

როგორც "ექსპრესნიუსს" სახელმწიფო უსაფრთხოების სამსახურში განუცხადეს, საქართველოს მოქალაქეები, დე-ფაქტო საზღვრის უკანონო კვეთის ბრალდებით დააკავეს.

"მომხდართან დაკავშირებით ამოქმედებულია ცხელი ხაზი. ევროკავშირის სადამკვირვებლო მისია ინფორმირებულია და სახელმწიფო უსაფრთხოების სამსახური მათ გასათავისუფლებლად მუშაობს", - აცხადებენ უწყებაში.

ცნობისთვის, მიმდინარე წლის სექტემბერში ე.წ. გამშვებ საზღვრის უკანონო გადაკვეთის ბრალდებით საქართველოს 42 მოქალაქე დააკავეს.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები