შავი ზღვის ეკონომიკური თანამშრომლობის ორგანიზაციის (BSEC) დაარსების 25-ე იუბილესთან დაკავშირებით BSEC-ის წევრი სახელმწიფოების მეთაურთა სამიტი გაიმართა, რომელშიც საქართველოს დელეგაციამ მონაწილეობა მიიღო საქართველოს პირველი ვიცე-პრემიერის, ფინანსთა მინისტრის დიმიტრი ქუმსიშვილის ხელმძღვანელობით.

ორგანიზაციის წევრი ქვეყნების დელეგაციების წინაშე გამოსვლისას, საქართველოს პირველმა ვიცე-პრემიერმა ხაზი გაუსვა BSEC-ის როლს, როგორც ეკონომიკური თანამშრომლობის კუთხით წამყვან რეგიონულ ორგანიზაციას.

აღინიშნა, რომ ორგანიზაციის მხრიდან საჭიროა ახალი ინიციატივებისა და ერთობლივი პროექტების ხელშეწყობა, რათა საერთაშორისო სამართლის პრინციპებისა და ნორმების დაცვით, BSEC-ის წევრ ქვეყნებს შორის ეკონომიკური თანამშრომლობის ხარისხი გაიზარდოს.

პირველმა ვიცე-პრემიერმა დიმიტრი ქუმსიშვილმა აღნიშნა, რომ საქართველო აქტიურად მონაწილეობს რეგიონული მნიშვნელობის სატრანსპორტო-სატრანზიტო პროექტებში და მხარს უჭერს რეგიონულ და საერთაშორისო ინიციატივებს, როგორიცაა ბაქო-თბილისი-ყარსის სარკინიგზო პროექტი, მულტიმოდალური ბლოკ-მატარებელი „Silk Wind“, სატრანსპორტო დერეფნები „Lapis Lazuli“ და „სპარსეთის ყურე, ირანი - შავი ზღვა, ევროპული ქვეყნები“.

ამასთან საქართველო, როგორც სტრატეგიული რეგიონული პარტნიორი, „ერთი სარტყელი - ერთი გზის“ გლობალური პროექტის ცენტრალური კორიდორის განვითარებას მხარს უჭერს.

ასეთი კორიდორის მიზანია უზრუნველყოს ტვირთის ეფექტურად მოძრაობა შორეული აზიიდან, შავი ზღვის რეგიონის გავლით ჩრდილო-დასავლეთი ევროპის მიმართულებით და პირიქით სარკინიგზო გზის მეშვეობით.

პირველმა ვიცე-პრემიერმა ყურადღება გაამახვილა რეგიონში უსაფრთხოებისა და კონფლიქტების დარეგულირების მხრივ არსებულ პრობლემებზე, რომლებიც აფერხებენ BSEC-ის წევრ ქვეყნებს შორის ეფექტური ეკონომიკური თანამშრომლობის განვითარებასა და ერთობლივი ინფრასტრუქტურული პროექტების განხორციელების შესაძლებლობას.

სამიტის ფარგლებში მიღებულ იქნა შავი ზღვის ეკონომიკური თანამშრომლობის ორგანიზაციის (BSEC) დაარსების 25-ე საიუბილეო დეკლარაცია, რომლის ტექსტი  შეთანხმდა 2017 წლის 21 მაისს გამართულ საგარეო საქმეთა მინისტრების საბჭოს (CMFA) სპეციალურ სხდომაზე.

საქართველოს დელეგაციის მოთხოვნით, დეკლარაციაში კიდევ ერთხელ დაფიქსირდა BSEC-ის წევრი ქვეყნების მიერ გაეროს წესდებით, ჰელსინკის დასკვნითი აქტის და ახალი ევროპისათვის პარიზის ქარტიით გათვალისწინებული პრინციპებისა და წესების დაცვის მხარდაჭერა.

ქართული მხარის წინადადებით, BSEC-ის სამიტის დეკლარაციაში პირველად იქნა დაფიქსირებული დებულებები შავ ზღვაში საერთაშორისო სამართლის პრინციპების გათვალისწინებით უსაფრთხო ნავიგაციის უზრუნველყოფისა და BSEC-ის წევრ სახელმწიფოებში ქვეყნის შიგნით იძულებით გადაადგილებულ პირთა (Internally Displaced Persons - IDP) უფლებების დაცვის აუცილებლობის თაობაზე.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კახა კალაძე 4 ოქტომბრის საქმეზე მორიგ დაკავებაზე: შესაბამისი საგამოძიებო უწყებები მოწოდების სიმაღლეზე არიან, ყველამ უნდა აგოს პასუხი

კახა კალაძე ელისაშვილის განაჩენზე: როდესაც კანონს ცდები, ყოველთვის მოყვება შესაბამისი რეაგირება

პოლიციამ ფატიმა კარიმოვას მკვლელობისთვის ძებნილი ბიძაშვილი, ემინ ალიევი ბათუმის საერთაშორისო აეროპორტში დააკავა

Apple-მა OpenAI-ს უჩივლა და კომპანიას სავაჭრო საიდუმლოებების მოპარვაში დასდო ბრალი