საქართველოს პარლამენტის და საკონსტიტუციო კომისიის თავმჯდომარის ირაკლი კობახიძის განცხადებით, საქართველოს უახლეს ისტორიაში პირველად ხდება, რომ მმართველო ძალა კონსტიტუციას თავის სასარგებლოდ არ ცვლის.

როგორც ირაკლი კობახიძემ საკონსტიტუციო კომისიაზე სიტყვით გამოსვლისას აღნიშნა, კონსტიტუცია არ იქნება მმართველ გუნდზე მორგებული, „როგორც ეს აქამდე ხდებოდა“.

კომისიის თავმჯდომარემ წევრებს და საზოგადოებას კონსტიტუციაში შემავალი ცვლილებები გააცნო.

„პირველად დაიგეგმა რეალურად ფართო ჩართულობაზე დაფუძნებული პროცესი, რომლის საფუძველზეც ძალიან ფართო წარმომადგენლობით შემუშავდა კონსტიტუციაში შესატანი ცვლილებების ძალიან ფართომასშტაბიანი პროექტი. ჩვენ გვქონდა 2 ძირითადი ამოცანა, ეს იყო კონსტიტუციის სრული შესაბამისობის უზრუნველყოფა კონსტიტუციური სამართლის პრინციპებთან, და მეორე ძალიან მყარი, დემოკრატიული კონსტიტუციური სისტემის ჩამოყალიბება. ამ ორი მიზნის შესაბამისად მოქმედებდა თითოეული ჩვენგანი, როდესაც მუშაობდა საქართველოს კონსტიტუციის ტექსტზე. პირველად, საქართველოს უახლოეს ისტორიაში ხდება ის, რომ არა თუ საკუთარ სუბიექტურ ინტერესებს არ არგებს კონკრეტული ძალა საქართველოს კონსტიტუციას, არამედ პირდაპირ შეიძლება ითქვას, რომ მოქმედი რეგულაციები, ახალი რედაქცია კონსტიტუციის, პირდაპირ ეწინააღმდეგება მმართველი ძალის სუბიექტურ ინტერესებს. ეს არის საერთო სულისკვეთება, რომელზეც არის დაფუძნებული საქართველოს კონსტიტუციის ახალი რედაქცია. კონსტიტუციის ყველა თავს ფუნდამენტური ცვლილებები შეეხო. დოკუმენტი გასწორდა როგორც იურიდიული ტექნიკის, ისე კონცეპტუალურ-შინაარსობრივი თვალსაზრისით“, - განაცხადა ირაკლი კობახიძემ.

აღსანიშნავია, რომ დაწყებიდან რამდენიმე წუთში სხდომა დატოვა “ლეიბორისტული პარტიის” წევრმა გიორგი გუგავამ. მან მმართველ გუნდს ბოიკოტი გამოუცხადა.

ცნობისთვის, მას შემდეგ, რაც თავმჯდომარემ დამსწრე წევრებს კენჭისყრის ტექნიკური დეტალები აუხსნა, ალტერნატიულ წინადადებებს განიხილავენ და კენჭისყრის პროცესზე გადავლენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ზელენსკიმ განაცხადა, რომ რუსეთის წინააღმდეგ შორი დისტანციის დარტყმები მშვიდობას აახლოებს

რუსეთის უდიდესმა ნავთობგადამამუშავებელმა ქარხანამ დრონებით თავდასხმის შემდეგ მუშაობა შეაჩერა

უკრაინის საგარეო საქმეთა მინისტრმა ანკარაში განაცხადა, რომ კიევი მზადაა რუსეთთან „უპირობო ცეცხლის შეწყვეტისთვის“

რუტე: მომავალი წლისთვის ალიანსს ექნება შესაძლებლობა, ყოველწლიურად 4 მლნ-მდე ჭურვი აწარმოოს