აჭარაში საუკეთესო ტურისტული ობიექტების დაჯილდოვება გაიმართა

2016-12-22 21:20:31, 2791 ნახვა

ეკონომიკა

სასტუმრო ,,ინტურისტ პალასში" ტურიზმის რეგიონალური ფორუმი „მაგნოლია 2016" გაიმართა, სადაც ტურიზმის სექტორის წარმატებული კომპანიები დაჯილდოვდნენ. ფორუმს აჭარის ა/რ მთავრობის თვამჯდომარე ზურაბ პატარაძე მინისტრთა კაბინეტის წარმომადგენლებთან ერთად ესწრებოდა.

აჭარის ტურიზმის დეპარტამენტის ორგანიზებით „მაგნოლია 2016" წელს მეორედ ტარდება. ღონისძიების მიზანი რეგიონში ტურიზმის დარგის სტიმულირება და გაუმჯობესებაა, რაც ტურიზმის სექტორში სერვისის ამაღლებას შეუწყობს ხელს. ფორუმზე პირველი ჯილდო გამარჯვებულ კომპანიას, სასტუმრო ,,ჰილტონს", სიმბოლურად აჭარის მთავრობის თავმჯდომარემ ზურაბ პატარაძემ გადასცა.

სულ ღონისძიებაზე 10 ნომინაციაში დაჯილდოვდა საუკეთესო საერთაშორისო ბრენდული სასტუმრო, სასტუმრო, სასტუმრო-საოჯახო სახლი სოფლად, რესტორანი, ტურისტული ატრაქცია, მუზეუმი, გიდი, ტურისტული სააგენტო, ტურისტული მარშრუტი და ახალი ტურისტული პროდუქტი.

აჭარის ტურიზმის დეპარტამენტმა გამარჯვებულები მომხმარებელთა კვლევისა და ტურიზმის სექტორის გამოკითხვების შედეგად გამოავლინა. მომხმარებელთა კვლევა პირისპირ და ონლაინ კვლევის მეთოდით სამი თვის განმავლობაში მიმდინარეობდა და ჯამში 1200 ტურისტი და მომხმარებელი გამოიკითხა. კვლევა ასევე ითვალისწინებდა Trip Adviser-ზე, Booking.com-სა და Facebook.com-ზე ტურისტების შეფასებებს. აჭარის ტურიზმის დეპარტამენტი საუკეთესო სერვისის მქონე ტურისტული ობიექტების გამოვლენისას მომხმარებლის კვლევის გარდა ტურისტული სააგენტოების, განთავსებისა და კვების ობიექტების, გიდებისა და სატრანსპორტო კომპანიების შეფასებებიც გამოიყენა.

ტურიზმის რეგიონალურ ფორუმზე "მაგნოლია-2016" ტურიზმში დასაქმებული კერძო კომპანიების, დონორი ორგანიზაციების, სამთავრობო და არასამთავრობო სექტორის 200 - მდე წარმომადგენელი იყო მოწვეული.

(NS)