საქართველოს პრემიერ-მინისტრმა გიორგი კვირიკაშვილმა მთავრობის დღევანდელი სხდომა ლევილის მამულის საქართველოსთვის გადმოცემის საკითხზე საუბრით დაიწყო.

მან ამ ფაქტს ისტორიული უწოდა და ქართველ ხალხს ეს მნიშვნელოვანი მოვლენა მიულოცა.

„დღეს არის პირველი მთავრობის სხდომა მას შემდეგ, რაც საფრანგეთში ხელი მოეწერა ლევილის მამულის საქართველოსთვის გადმოცემის აქტს. მინდა, გამოვეხმაურო და პირველ რიგში ყველას მოგილოცოთ ეს ძალიან მნიშვნელოვანი მოვლენა საქართველოს დამოუკიდებლობის აღდგენის დღიდან მოყოლებული, 25 წელია, სხვადასხვა ფორმით მიმდინარეობდა ამ საკითხზე მუშაობა და ძალიან მახარებს, რომ სწორედ დღეს დასრულდა ეს ძალიან დიდი პროცცესი. სწორი მიდგომით, ძალიან ხანგრძლივი და შრომატევადი მოლაპარაკების შედეგად, მიღწეული იქნა ძალიან დიდი შედეგი ჩვენი ქვეყნისთვის. ლევილის მამულის საქართველოსთვის გადმოცემა მართლაც ისტორიული მოვლენაა“,-განაცხადა გიორგი კვირიკაშვილმა.

მისივე თქმით, გათვალისწინებულია, ლევილის მამულის ბაზაზე მოეწყოს პირველი რესპუბლიკის ისტორიული და კულტურული ქართულ-ფრანგული მემორიალური ცენტრი, ლევილის ქართული აკადემია.

„აქ იქნება შესაძლებლობა, რომ იყოს ისტორიული სამუზეუმო სივრცე, საარქივო სივრცე, ბიბლიოთეკა, სამკითხველო დარბაზი, საკონფერენციო დარბაზი და აკადემიის ფარგლებში იქნება საშუალება, რომ ქართველმა მეცნიერებმა დაყონ იქ გარკვეული დრო, იქნება მკვლევარებისთვის, სტუდენტებისთვის, მხატვრებისთვის, მუსიკოსებისთვის განსაზღვრული სივრცე, მათ შორის საცხოვრებელი ოთახები, სადაც საშუალება იქნება, რომ დარჩნენ და იმუშაონ საფრანგეთში. ამას ექნება ძალიან დიდი მნიშვნელობა საფრანგეთსა და საქართველოს შორის კულტურული, მეცნიერული და სხვა მიმართულებების განვითარებისთვის. ასევე, მინდა მოგილოცოთ ყველას, დიდი მადლობა გადავუხადო გელა დუმბაძესა და თეა წულუკიანს, რომლებმაც უდიდესი წვლილი შეიტანეს, არ მეშინია ამ სიტყვის, ნამდვილად არაადამიანური შრომა გასწიეს იმისათვის, რომ მიღწეული ყოფილიყო ეს შეთანხმება. მინდა,მადლობა გადავუხადო ყველა ჩვენს თანამემამულეს, რომელიც ცხოვრობს საფრანგეთში და რომლებთანაც იქნა მიღწეული ეს შეთანხმება“, - აღნიშნა გიორგი კვირიკაშვილმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ნაუსედა: ჩვენ გვაქვს სადაზვერვო ინფორმაცია, რომ რუსეთი ლიეტუვის ინფრასტრუქტურაზე თავდასხმებს გეგმავს

დღეს უკრაინის სახელმწიფოებრიობის დღეა - კიევი საერთაშორისო პარტნიორებს მასპინძლობს

ზურა ჯაფარიძეს ავტომობილი დაეჯახა - პოლიტიკოსი კლინიკაშია გადაყვანილი

ქუთაისში, იოსელიანის ქუჩაზე ხარაჩო ჩამოიშალა და მუშა მოიყოლა, ის გარდაიცვალა