2025-02-28 18:36:59, 617 ნახვა

---

ლევან ჟორჟოლიანი - სტიქიის სალიკვიდაციო ღონისძიებების დასრულების შემდეგ, ყველა მუნიციპალიტეტში შეიქმნება კომისიები ზარალის აღწერისა და კომპენსაციის საკითხებზე

სტიქიის სალიკვიდაციო ღონისძიებების დასრულების შემდეგ, ყველა მუნიციპალიტეტში შეიქმნება შესაბამისი კომისიები, რომლებიც ზარალს აღწერენ, რის შემდეგაც გადაწყდება კომპენსაციისა და ანაზღაურების საკითხები. ამის შესახებ მთავრობის ადმინისტრაციის უფროსმა, ლევან ჟორჟოლიანმა განაცხადა.

ჟორჟოლიანის თქმით, ამ ეტაპზე ზარალის დათვლა შეუძლებელია, რადგან სტიქიის სალიკვიდაციო ღონისძიებები კვლავ მიმდინარეობს და პროცესი ჯერ არ დასრულებულა. „შეიქმნება კომისიები, რომლებიც ზარალს აღწერენ და შემდეგ გადაწყდება კომპენსაციის, ზარალის ანაზღაურებისა და ინფრასტრუქტურული საკითხები“, - აღნიშნა მან.

მთავრობის ადმინისტრაციის უფროსი პრიორიტეტულად მიიჩნევს ელექტრომომარაგების აღდგენას. მისი თქმით, უკვე არსებობს კარგი დინამიკა, რადგან დაზიანებებს დრონებით აკვირდებიან, ხოლო რთულად მისასვლელ ადგილებში ბურანებსა და თოვლმავლებს იყენებენ. „ჩვენ ძალიან კარგი დინამიკა გვაქვს, გუშინ, 35,000 გათიშული აბონენტიდან 24,000-ზე მეტი უკვე იყო ჩართული, ხოლო დღეს კიდევ 4,800 აბონენტს დაემატა“, - აღნიშნა ლევან ჟორჟოლიანმა.

გარდა ამისა, მისივე თქმით, პრიორიტეტია ინციდენტებზე სწრაფი რეაგირება, რაც მოიცავს 112-ის სისტემაში შესულ ზარებსა და სოციალურ ქსელებში გავრცელებულ ინფორმაციას.

„მუდმივ რეჟიმში ვიღებთ ინფორმაციას აბონენტების აღდგენაზე. რა თქმა უნდა, ყველა უწყება ჩართულია და მაქსიმალურად ვცდილობთ, რომ ყველა მოსახლეს მივაწვდინოთ დახმარება“, - განაცხადა ლევან ჟორჟოლიანმა.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი