2016-02-23 14:20:14, 770 ნახვა

---

ახვლედიანი: გამოცდების პერიოდში კომპიუტერებში ინტერნეტი იყო ჩართული და ზოგიერთი გამოსაცდელი საკანონმდებლო მაცნეს ინფორმაციით სარგებლობდა

თბილისის საქალაქო სასამართლოს ყოფილი თავმჯდომარის მამუკა ახვლედიანის ინფორმაციით, მოსამართლეთა საკვალიფიკაციო გამოცდების მიმდინარეობისას კომპიუტერებში ინტერნეტი იყო ჩართული და გამოცდის ზოგიერთი მონაწილე საკანონმდებლო მაცნეს ინფორმაციით სარგებლობდა.

ახვლედიანის თქმით, ეს კანონდარღვევაა.

„ჩემთვის ძალიან ბევრ საინტერესო ადამიანს აქვს მიღებული მონაწილეობა იმ გამოცდებში. ზოგმა პირველი ეტაპი გაიარა, ზოგმა მეორეც, მათ გარკვეული ურთიერთობები აქვთ იუსტიციის უმაღლესი საბჭოს წევრებთან და უზენაეს სასამართლოს თავმჯდომარე ნინო გვენეტაძესთან.

მაგალითისთვის გეტვით, გამოცდების პერიოდში კომპიუტერებში ინტერნეტი იყო ჩართული და ზოგიერთი გამომცდელი საკანონმდებლო მაცნეს ინფორმაციით სარგებლობდა, რაც კანონის დარღვევაა. ჩემი ინფორმაციით, ზოგიერთი ადამიანი გაძევებულიც კი არის გამოცდიდან.

იქნებ პირდაპირ მიწერ-მოწერაც ჰქონდა ვინმეს და ფლეშკის გამოყენებით გადაწერა ეს ყველაფერი. როგორ გამოიკვლია იუსტიიცის უმაღლესი საბჭოს მდივანმა ლევან მურუსიძემ ეს ყველაფერი, აიტი სპეციალისტი ჩართო ამ პროცესში თუ საბჭოს რომელიმე წევრია ამის სპეციალისტი, ეს ჩემთვის ბუნდოვანია“, - განაცხადა ახვლედიანმა.

კითხვაზე შიდა მოკვლევა, ვინმეს დანაშაულის დაფარვის მიზნით ხომ არ დაიწყო,  ახვლედიანმა ასე უპასუხა:

„რა თქმა უნდა, კიდევ უფრო შორს წავალ, არა მარტო დაფარვის, არამედ შესაძლებელია რაღაც გარკვეული ჯგუფი, მეორე ჯგუფს, ან კონკრეტულ ადამიანს აშანტაჟებდა კიდეც ამის გამო და მისთვის სასურველ გადაწყვეტილებას სთხოვდა. არც ამას გამოვრიცხავ, ესეც მოსაზრებაა. განაცხადა მამუკა ახვლედიანმა.

მამუკა ახვლედიანი მოსამართლეთა საკვალიფიკაციო ტესტების გამჟღავნების თაობაზე იუსტიციის უმაღლესი საბჭოს მდივნის ლევან მურუსიძის მიერ წარმოებული მოკვლევის მასალებს ეჭვქვეშ აყენებს.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი