აპატურაი: ნატო-ში ბევრი რამ არ ხორციელდება იმ ტემპებით, როგორც საქართველოს არსებითი პაკეტის შესრულებისთვის მუშაობა მიდის

2015-02-02 17:21:05, 2268 ნახვა

მსოფლიო

"ნატო-ში ბევრი რამ არ ხორციელდება იმ ტემპებით, როგორც საქართველოს არსებითი პაკეტის შესრულებისთვის მუშაობა მიდის",-ამის შესახებ ნატო-ს გენერალური მდივნის სპეციალურმა წარმომადგენელმა კავკასიასა და ცენტრალურ აზიაში ჯეიმს აპატურაიმ "მოამბესთან" ექსკლუზიურ ინტერვიუში განაცხადა.
როგორც აპატურაიმ აღნიშნა, საწვრთნელი ცენტრის განთავსების ადგილთან დაკავშირებით, მომავალ თვეში საქართველოს ნატო-ს ექსპერტები ეწვევიან, რომლებიც ქართულ მხარეს რჩევებს მისცემენ. თუმცა, აპატურაის თქმით, ცენტრის განთავსების ადგილზე საბოლო გადაწყვეტილება, თავად საქართველომ უნდა მიიღოს. აპატურაის შეფასებით, საქართველოს არსებითი პაკეტის შესრულებისთვის მუშაობა სწრაფი ტემპით მიდის.
"ხანდახან, დიპლომატები ამბობენ, რომ იმპლემენტაცია დაწყებულია და სინამდვილეში ეს ასე არაა, მაგრამ ეს ის შემთხვევაა, როდესაც მართლაც დავიწყეთ პაკეტის შესრულება. ძალიან კმაყოფილი ვარ იმ წვლილით, რომელიც წევრ სახელმწიფოებს შეაქვთ პაკეტის შესრულების საქმეში. ჩვენ ვაკეთებთ ყველაფერს, რათა მინისტერიალზე ვთქვათ, რომ გვაქვს პროგრესი. გენერალური მდივნის მოადგილემ დაათვალიერა ერთი შესაძლო ადგილი, სადაც შეიძლება განთავსდეს ერთობლივი საწვრთნელი ცენტრი. ჩვენ დამატებით მომავალ თვეში ვაგზავნით ექსპერტებს. უნდა გითხრათ, რომ ნატოში ბევრი რამ არ ხორციელდება იმ ტემპებით, როგორც საქართველოს არსებითი პაკეტის შესრულებისთვის მუშაობა მიდის. საბოლოო გადაწყვეტილებას საწვრთნელი ცენტრის ლოკაციის შესახებ საქართველო მიიღებს. ეს არის საქართველოს ტერიტორია. ექსპერტები დაეხმარებიან ადგილზე ქართული მხარის წარმომადგენლებს, მისცემენ რჩევებს. გენერალურმა მდივანმა დაათვალიერა ერთი შესაძლო ვარიანტი. ახლა, რამდენიმე კვირაში, საქართველოში ნატო-ს ექსპერტები ჩამოვლენ და ამის შემდეგ საბოლოო გადაწყვეტილებას საქათველო მიიღებს",-განაცხადა ჯეიმს აპატურაიმ.
საზოგადოებრივი მაუწყებლის ეთერში ამ ინტერვიუს მხოლოდ ფრაგმენტი აჩვენეს, ვრცელი ინტერვიუ კი, დღეს "მოამბის " მთავარ გამოშვებაში გავა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან