სახელმწიფო სოციალურად დაუცველებისთვის დენის ტარიფში არსებულ სხვაობას მთლიანად დაფარავს

2015-07-24 20:20:58, 496 ნახვა

პოლიტიკა

მთავრობამ ელექტროენერგიის საფასურის სუბსიდირების სქემა წარადგინა. როგორც პრემიერ-მინისტრმა ირაკლი ღარიბაშვილმა განაცხადა, სახელმწიფო სოციალურად დაუცველი ყველა ოჯახისთვის ელექტროენერგიის ტარიფში არსებულ სხვაობას მთლიანად დაფარავს.
"ჩვენი მთავრობა ყველაფერს აკეთებს იმისათვის, რომ სემეკის ეს გადაწყვეტილება მძიმე ტვირთად არ დააწვეს პირველ რიგში სოციალურად დაუცველ მოსახლეობას. ჩემი დავალებით, მთავრობის ეკონომიკურმა გუნდმა დაამუშავა სუბსიდირების რამდენიმე სქემა და ბოლოს შევაჩერეთ ყურადღება ისეთ მოდელზე, სადაც სახელმწიფო მთლიანად დაფარავს ტარიფში არსებულ სხვაობას სოციალურად დაუცველი ყველა ოჯახისთვის. არც ერთ სოციალურად დაუცველ ოჯახს არ მოუწევს არც ერთი თეთრი იმაზე მეტის გადახდა, რასაც აქამდე იხდიდა.
ეს ეხებეა ყველა სოციალურად დაუცველ ოჯახს, ვინც 70 000 ქულა მიიღო სოციალურად დაუცველთა ბაზაში იმისდა მიუხედავად, რომელი კატეგორიის მომხმარებელია, ბევრ ელექტროენერგიას მოიხმარს, თუ ცოტას.
633 000 ადამიანისთვის განსხვავებას ძველსა და ახალ ტარიფს შორის სრულად დაფარავს სახელმწიფო",-განაცხადა ირაკლი ღარიბაშვილმა.
მისივე თქმით, სუბსიდირებისთვის ბიუჯეტიდან დამატებით დაახლოებით, 20 მლნ ლარის გამოყოფა იქნება საჭირო.
" ეს დამატებითი ხარჯი იქნება ბიუჯეტისთვის, მაგრამ ეს არის აუცილებელი ხარჯი, რომ მოსახლეობის ყველაზე დაუცველი ფენა არ დაზარალდეს. ჩვენ ვართ რეალურად სოციალურად ორიენტირებული მთავრობა",-აღნიშნა ირაკლი ღარიბაშვილმა.
შეგახსენებთ, სემეკმა „ენერგო პრო ჯორჯიას“ მომხმარებლებისთვის ელექტროენერგიის ტარიფი დღგ-ს გარეშე, 3,348 თეთრით გაზარდა.
სამომხმარებლო ტარიფი თითოეულ საფეხურზე დაახლოებით 3 თეთრით გაიზარდა.
ამ ეტაპზე სამომხმარებლო ტარიფი (დღგ-ს გარეშე)101 კვტსთ-ის ჩათვლით და საერთო მოხმარების მრიცხველის აბონენტებისათვის 7.630 თეთრს შეადგენს; 101 კვტსთ-დან 301 კვტსთ-ის ჩათვლით - 11.000 თეთრს; 301 კვტსთ-დან და მეტი - 14.830 თეთრს შეადგენს.
შესაბამისად 101 კვტსთ-ის ჩათვლით და საერთო მოხმარების მრიცხველის აბონენტებისათვის ტარიფი 10.978 თეთრი, 101 კვტსთ-დან 301 კვტსთ-ის ჩათვლით - 14.348 თეთრი, ხოლო 301 კვტსთ-დან და მეტი - 18.178 თეთრი იქნება.
"ენერგო პრო ჯორჯიას“ წარმომადგენლების განცხადებით, წარმოდგენილი პროექტით ზრდა საკმარისი არ არის. ისინი დაახლოებით 4,2 თეთრით ზრდას ითხოვდნენ.
აღსანიშნავია, რომ საქართველოს ენერგეტიკისა და წყალმომარაგების მარეგულირებელ ეროვნულ კომისიას სატარიფო განაცხადით სს „თელასმაც“ მიმართა.
"თელასის“ სატარიფო განაცხადზე საჯარო-ადმინისტრაციულ წარმოებას ენერგეტიკისა და წყალმომარაგების მარეგულირებელი ეროვნული კომისია დაახლოებით სამ დღეში დაიწყებს.