ზაზა სარალიძე და მალხაზ მაჩალიკაშვილი პარლამენტთან საპროტესტო აქციას მართავენ

2018-09-10 17:57:28, 1090 ნახვა

საზოგადოება

პარლამენტის შენობასთან ხორავას ქუჩაზე მოკლული ერთ-ერთი მოზარდის მამა, ზაზა სარალიძე და პანკისის ხეობაში სპეცოპერაციის დროს მოკლული თემირლან მაჩალიკაშვილის მამა, მალხაზ მაჩალიკაშვილი აქციას მართავენ.

როგორც აქციის დაწყებამდე ზაზა სარალიძემ ჟურნალისტებს განუცხადა, მათი მთავარი მოთხოვნა სამართლიანობის აღდგენაა.

მანვე დასძინა, რომ აქცია არ არის პოლიტიკური, თუმცა მასში მონაწილეობა ყველა პოლიტიკოსს შეუძლია.

„ყველა, ვინც ხელი დააფარა ამ საქმეს, პასუხისგებაში უნდა მიეცეს. უფრო კონკრეტულად აქციის მსვლელობისას ვისაუბრებთ. დღეს ხელს აფარებენ მკვლელებს და საქმის გამყალბებლებს. ეს არ არის პოლიტიკოსების აქცია, ეს არის შვილმოკლული მშობლების აქცია. პოლიტიკოსებს შეუძლიათ შემოგვიერთდნენ როგორც თანამოქალაქეები. მთავარი მოთხოვნაა სამართლიანობის აღდგენა. აქციები გაგრძელდება იქამდე, სანამ ჩვენი მოთხოვნები არ დაკმაყოფილდება“, - განაცხადა სარალიძემ.

აქციის დაწყებამდე კომენტარი მალხაზ მაჩალიკაშვილმაც გააკეთა. ის ისევე როგორც სარალიძე, სამართლიანობის აღდგენას ითხოვს და მისი შვილის მკვლელის დასჯაზე საუბრობს.

„მთავარი მოთხოვნა იქნება, დაისაჯონ ის ადამიანები, რომლებიც უშუალოდ არიან ამ საქმეში ჩარეული. ხმამაღლა ვიტყვი - ამ ტერაქტში არიან გარეული ეს ადამიანები. მათ ხელები სისხლში აქვთ ამოთხვრილი. ესენი არიან ვახტანგ გომელაური და სპეცრაზმელი გოგაშვილი“, - განაცხადა მალხაზ მაჩალიკაშვილმა.

პარლამენტის მიმდებარე ტერიტორიაზე შვილმოკლული მამების მხარდამჭერები იკრიბებიან. ადგილზე ცოტა ხნის წინ "ევროპული საქართველოს" ლიდერები მივიდნენ.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები