საქართველოს იუსტიციის მინისტრის ინიციატივით, სსიპ „საქართველოს ეროვნული არქივის" ძველ კინოდარბაზს რეკონსტრუქცია ჩაუტარდა.

25-წლიანი პაუზის შემდეგ ეროვნული არქივის კინოდარბაზი 10 აპრილს ოფიციალურად გაიხსნება, გუშინ  კი, კინოდარბაზის პრეზენტაცია ექსკლუზიურად მოეწყო კინოს სფეროს სხვადასხვა თაობის მოღვაწეებისათვის, ასევე, იმ რეჟისორებისა და რეჟისორთა შთამომავალთათვის, რომელთა ნამუშევრებსაც ეროვნული არქივი ინახავს. სტუმრებს საქართველოს იუსტიციის მინისტრმა თეა წულუკიანმა უმასპინძლა.

კინოდარბაზის რეკონსტრუქციის პროექტი საქართველოს ეროვნულ არქივში დაცული მასალების საზოგადოებისთვის გაცნობის მიზნით ბოლო 4 წლის განმავლობაში განხორციელებული კიდევ ერთი მასშტაბური პროექტია. 140 მაყურებელზე გათვლილი მულტიფუნქციური, უახლესი ტექნიკით აღჭურვილი კინოდარბაზი საქართველოში ერთადერთი კინოთეატრი იქნება, სადაც ფილმის პროექცია კინოფირიდანაც იქნება შესაძლებელი − განახლებულ კინოდარბაზში ციფრულ აპარატურასთან ერთად დამონტაჟდა პროექტორი, რომელიც კინოფირზე გადაღებული ფილმების მაქსიმალური ხარისხით ჩვენებას უზრუნველყოფს. თანამედროვე სტანდარტებით მოეწყო დარბაზის აუდიო- და აკუსტიკური სისტემაც.

„ვფიქრობთ, საგამოფენო პავილიონის მსგავსად, თბილისს ეს კინოდარბაზიც ბევრ სიახლეს შეჰმატებს. ჩვენი მიზანია, ეროვნულ არქივში დაცული მხატვრული, დოკუმენტური თუ ანიმაციური ფილმები ფართო საზოგადოებამ, მათ შორის, ბავშვებმა, ნახოს. ასევე, გვინდა, რომ კინოს სფეროს მოღვაწეებისათვის ეს დარბაზი ხელმისაწვდომი იყოს. მისი უნიკალურობა ისიც იქნება, რომ ის კომერციულ მიზნებზე არ იქნება გათვლილი და ხელოვნების ამ სფეროს განვითარებაში თავის წვლილს შეიტანს", − განაცხადა იუსტიციის მინისტრმა.

კინოდარბაზის დათვალიერების შემდეგ სტუმრებმა კინოდარბაზის სახელის საკუთარი ვერსიები წარმოადგინეს, საიდანაც გახსნის დღისთვის ერთ-ერთი უნდა შეირჩეს.

პრეზენტაციისას კინოდარბაზის ფოიეში გამოიფინა თვითნასწავლი მოქანდაკის, ონელი ზაურ გამყრელიძის, ნამუშევრები. ახალგაზრდა ხელოვანი 14 წლის ასაკიდან პლასტილინით ძერწავს  შინაარსით გამორჩეულ განსხვავებულ ექსპონატებს.  

კინოდარბაზი ეროვნული არქივის შენობაში 1970-იანი წლების ბოლოდან 1990-იანი წლების დასაწყისამდე მოქმედებდა. იმ პერიოდში მისი ძირითადი დანიშნულება თემატური კინოსეანსების გამართვა იყო. ტექნიკური პრობლემების გამო, კინოდარბაზს ფუნქცია 25 წელზე მეტი ხნის განმავლობაში ჰქონდა დაკარგული და მას დოკუმენტების საცავად იყენებდნენ.

საქართველოს მასშტაბით ეროვნული არქივი დოკუმენტური ფილმებისა და კინოჟურნალების ყველაზე დიდი საცავია. აქ დაცულია 5252 დოკუმენტური ფილმი, 3194 კინოჟურნალი, 1032 კინოსიუჟეტი, 111 მხატვრული და 38 ანიმაციური ფილმი. 

კინოდარბაზის გახსნის შემდეგ ეროვნულ არქივს საშუალება ექნება, მოაწყოს საარქივო ფილმების ფესტივალები, რეტროსპექტივები და თემატური ჩვენებები, რითაც საზოგადოებისთვის ხელმისაწვდომი გახდება უმდიდრესი ფილმსაცავი. 

(NS)

ავტორი: ,

სოციალური ქსელები

კობახიძე- კასრების იმედზე რომ დაიწყეს ომი, იმიტომაც დაამთავრეს ორ დღეში მარცხით 2008 წელს

კობახიძემ მოიტყუა როცა თქვა, რომ 2011 წლის აქციის დარბევაზე დასავლეთს და ევროპულ სტრუქტურებს რეაქცია არ ჰქონიათ

კობახიძე - არაფორმალური ოლიგარქიული გავლენებით მოქმედი სხვა ევროპული ინსტიტუტების მსგავსად, უკვე ეუთოც ღიად ჩართეს პროცესში

რუმინეთის საგარეო მინისტრი - საქართველს უნდა ჰქონდეს ჯანსაღი დემოკრატია