პროკურორი: დეკანოზმა არ გაუშვა შანსი ხელიდან, საქმის განხილვა კიდევ ერთხელ გაეჭიანურებინა

2017-05-30 13:08:22, 2616 ნახვა

სამართალი კომენტარი

ე.წ. ციანიდის საქმის პროკურორის ჯარჯი წიკლაურის განცხადებით, მამა გიორგი მამალაძე ცდილობს, თავი აარიდოს მართლმსაჯულებას და გააჭიანუროს პროცესი.

როგორც მან ჟურნალისტებს განუცხადა, ბრალდებულმა დღეს ახალი საბაბი გამოიყენა, როდესაც სახაზინო წესით დანიშნული ადვოკატების ჩართვის მიზეზით კიდევ ერთხელ გააჭიანურა საქმის განხილვა.

„დღევანდელ სხდომაზე სახაზინო ადვოკატმა განაცხადა, რომ უნდა ჩამოცილებოდნენ საქმის განხილვას, ვინაიდან ბრალდებულს ჰყავს ოთხი აყვანილი ადვოკატი. თუმცა, ბრალდებულმა განაცხადა, რომ იგი დამატებით კიდევ საჭიროებდა სახაზინო ადვოკატებს. ბრალდებულს სურდა დღევანდელი სხდომის კიდევ ერთხელ გადადება იმ მოტივით, რომ ახალი ადვოკატები გაეცნონ საქმის მასალებს. ბრალდებულმა არ გაუშვა შანსი ხელიდან, რომ კიდევ ერთხელ გაეჭიანურებინა საქმის განხილვა. მას არ უნდა ნორმალური მართლმსაჯულება, რადგან კარგად იცის, რომ უტყუარი მტკიცებულებების გამოკვლევის ეტაპზე, მისი ბრალეულობა დადასტურდება და ყველანაირი გზით ცდილობს, პროცესის გაჭიანურებას. მან გახსოვთ, ჩაშალა პროცესი, როდესაც პროტესტის ნიშნად დატოვა სხდომა, დღეს კი, ახალი ადვოკატების ჩართვის საბაბით კიდევ ერთხელ გააჭიანურა საქმის განხილვა“, - აღნიშნა ჯარჯი წიკლაურმა.

ცნობისთვის, ე.წ. ციანიდის საქმეზე სასამართლო პროცესი 9 ივნისს გაიმართება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან