ასამბლეა მოუწოდებს ნატო-ს მთავრობებს, უზრუნველყონ ინტეგრაციის პროცესში საქართველოს მტკიცე პოლიტიკური მხარდაჭერა

2017-05-29 10:03:24, 1963 ნახვა

პოლიტიკა

თბილისში, ნატოს საპარლამენტო ასამბლეის საგაზაფხულო სესიაზე, დღეს საქართველოს ევროატლანტიკური ინტეგრაციის მხარდამჭერ დეკლარაციას მიიღებენ. სამუშაო დოკუმენტის შინაარსი უკვე ცნობილია.

ასამბლეა აღიარებს არსებითი პაკეტის იმპლემენტაციის პროცესში მირწეულ შთამბეჭდავ პროგრესს; ამასთან, ასამბლეა მაღალ შეფასებას აძლევს საქართველოს მიერ დემოკრატიის კიდევ უფრო მეტი კონსოლიდაციისთვის, მისი ინსტიტუტების გამჭვირვალობის გაუმჯობესებისა და ეკონომიკური განვითარების ხელშეწყობის მიმართულებით მიღწეულ თანმიმდევრულ და მნიშვნელოვან პროგრესს.

ასევე, მოუწოდებს ჩრდილოატლანტიკური ალიანსის მთავრობებსა და პარლამენტებს: უზრუნველყონ ნატო-ში ინტეგრაციის პროცესში საქართველოს მტკიცე პოლიტიკური მხარდაჭერა. კიდევ უფრო გააღრმავონ საქართველოს ნატო-ში ინტეგრაციის პოლიტიკური განზომილება, რათა შეიქმნას პირობები საქართველოსთვის გაწევრიანების სამოქმედო გეგმის მისანიჭებლად; სრულად მიიღონ მონაწილეობა ნატო-საქართველოს არსებით ღონისძიებათა პაკეტის იმპლემენტაციაში და განიხილონ დამატებითი პრაქტიკული გზები საქართველოს მხარდასაჭერად ძალისხმევის გააქტიურებაზე; დაეხმარონ საქართველოს, გააძლიეროს შესაძლებლობები ჰიბრიდული საფრთხეების საწინააღმდეგოდ, პროპაგანდისა და დეზინფორმაციული კამპანიის ჩათვლით; კიდევ უფრო განავითარონ საქართველოსთან, როგორც ასპირანტ ქვეყანასთან, შავი ზღვის უსაფრთხოების თემაზე დიალოგი და პრაქტიკული თანამშრომლობა.

გარდა ამისა, ნატო-ს საპარლამენტო ასამბლეა, მოუწოდებს საქართველოს მთავრობასა და პარლამენტს: ნატო-ში ინტეგრაციის პროცესის წინსვლის მიზნით, სრულად გამოიყენოს ის შესაძლებლობები, რასაც ნატო-საქართველოს კომისია, წლიური ეროვნული პროგრამა, გაძლიერებული შესაძლებლობების ჯგუფში და თავდაცვის შესაძლებლობების განვითარების ინიციატივაში მისი მონაწილეობა და ნატო-საქართველოს არსებით ღონისძიებათა პაკეტი იძლევა; გააგრძელოს დემოკრატიული ინსტიტუტების გაძლიერება.