ჩრდილოატლანტიკური საბჭოს ორდღიანი ოფიციალური ვიზიტის ფარგლებში საქართველოში ნატოს სამხედრო კომიტეტის თავმჯდომარე, გენერალი პეტრ პაველი იმყოფება. დღეს ალიანსის პირველი სამხედრო პირი საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ მიიღო.

გენერალურ შტაბში გამართულ შეხვედრაზე მხარეებმა ნატო-საქართველოს სამხედრო თანამშრომლობის პრიორიტეტები და ნატო-საქართველოს არსებითი პაკეტის იმპლემენტაციის დეტალები განიხილეს. საუბარი შეეხო საქართველოს კონტრიბუციას საერთაშორისო მისიებში და ნოემბერში საქართველოში დაგეგმილ ნატო-საქართველოს ერთობლივი სწავლებას. შეხვედრის ერთ-ერთი თემა იყო ასევე, საქართველოსა და რეგიონში არსებული უსაფრთხოების გარემო და მისი ზეგავლენა საქართველოში მიმდინარე პროცესებზე.

შეხვედრის დასრულების შემდეგ, გენერალ-მაიორმა ვახტანგ კაპანაძემ საქართველოში ჩრდილოატლანტიკური საბჭოს ვიზიტის მნიშვნელობა შეაჯამა და გენერალ პეტრ პაველთან განხილული თემების შესახებ ისაუბრა: „ვიზიტი სწორ დროს სწორი აქცენტებით ტარდება. ძირითადად წამყვანი პოლიტიკური ნაწილის შეხვედრა იყო, სადაც არსებული მდგომარეობა განვიხილეთ. საქართველოს ხაზგასმით გადაუხადეს მადლობა იმ კონტრიბუციისთვის, რასაც ავღანეთში და ზოგადად, ნატოსთან მიმართებაში ახორციელებს. ითქვა, რომ საქართველო გამორჩეული პარტნიორია ნატოს პარტნიორი ქვეყნებიდან. სამხედრო კომიტეტის თავმჯდომარის ვიზიტი ძალიან დიდი პატივი იყო ჩვენთვის. გენერალი გაეცნო რეგიონში არსებულ ვითარებას, იმ ნაბიჯებს, რომელსაც საქართველოს შეიარაღებული ძალები ნატოსთან მიმართებაში დგამს. ძალიან მნიშვნელოვან საკითხებს გაესვა ხაზი“.

ნატოს სამხედრო კომიტეტის თავმჯდომარემ საქართველოს შეიარაღებულ ძალებს საერთაშორისო ოპერაციებში მონაწილეობისთვის მადლობა გადაუხადა და ქართველ სამხედროებს სანდო პარტნიორები უწოდა.

„მინდა, მადლიერება გამოვხატო საქართველოს შეიარაღებულ ძალებში მიმდინარე რეფორმებისა და ნატოს ეგიდით მიმდინარე საერთაშორისო ოპერაციებში საქართველოს კონტრიბუციის, სწავლებებში მონაწილეობისა და თანამშრომლობის გამო. ნატოსთვის საქართველო ძალიან სანდო და აქტიური პარტნიორია. ჩვენ 13 მთავარი მიმართულებით ვთანამშრომლობთ. ნოემბერში კი, საქართველო ნატო-საქართველოს სწავლებას უმასპინძლებს. ნატოს პოლიტიკური და სამხედრო ხელმძღვანელობის მხრიდან საქართველოს ძლიერი მხარდაჭერა აქვს. ჩვენ ყველა რამდენიმე წლის წინ ბუქარესტში მიღებული გადაწყვეტილების ერთგული ვრჩებით. საქართველოსთან ახლო თანამშრომლობით, რეფორმებზე ერთობლივი მუშაობით, ურთიერთთავსებადობის გაძლიერებით - საქართველო ნატოს სულ უფრო უახლოვდება. მოხარული ვარ, რომ დიდ პროგრესს ვხედავ. ქართველი სამხედროები ნამდვილი პარტნიორები და სანდო თანამებრძოლები არიან. ძალიან მიხარია, რომ ჩვენ შეგვიძლია ქართველი ჯარისკაცების იმედი გვქონდეს“, - განაცხადა გენერალმა პეტრ პაველმა. 

შეხვედრაზე გენერლებმა მომავალ წელს საქართველოში ნატოს სამხედრო კომიტეტის ვიზიტის შესახებაც იმსჯელეს. მანამდე, კი საქართველო ნატოსთან სამუშაო ჯგუფების დონეზე მჭიდრო ურთიერთობას გააგრძელებს.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საია - გავრცელებული შემაშფოთებელი კადრები სისტემური და სისტემატური საპოლიციო ძალადობის კიდევ ერთ ილუსტრაციას წარმოადგენს, რომელიც წლების განმავლობაში ავტორიტარული რეჟიმის ხელწერად იქცა

პირმა წარსულში არსებული დავის ნიადაგზე 2 კაცი მოკლა

ახმეტაში, შვილის გადარჩენის მცდელობისას მამაკაცი ტბაში დაიხრჩო

ბრიტანეთმა რუსული „ჩრდილოვანი ფლოტის“ ტანკერი დააკავა