ცესკოში ინფორმაციის დაცულობის ცენტრი გაიხსნა

2021-09-03 16:15:02, 526 ნახვა

საზოგადოება

საარჩევნო ადმინისტრაციაში კიდევ ერთი ინოვაციური პროექტი დაინერგა. ცენტრალურ საარჩევნო კომისიაში (ცესკო) ინფორმაციის დაცულობის ცენტრი გაიხსნა. ცენტრი საარჩევნო პერიოდში მედიის მონიტორინგს ახორციელებს და ამზადებს ანალიზს თუ რა ტიპის ინფორმაცია ვრცელდება საარჩევნო ადმინისტრაციის შესახებ; კერძოდ, ცენტრის მიზანია, გამოავლინოს არასწორი ან ცრუ ინფორმაცია, უზრუნველყოს ორგანიზაციის მიერ გავრცელებული სიახლეების სისწორე და კომპეტენციის ფარგლებში აღკვეთოს მცდარი სიახლეების გავრცელება. საქართველოს ცესკო პირველია საარჩევნო ადმინისტრაციებს შორის, რომელმაც ასეთი ინოვაციური პროექტი განახორციელა.
ინფორმაციის დაცულობის ცენტრის მუშაობის სპეციფიკა დღეს ცესკოს თავმჯდომარემ საერთაშორისო ორგანიზაციების და დიპლომატიური კორპუსის წარმომადგენლებს გააცნო. პრეზენტაციის შემდეგ ღონისძიების მონაწილეებმა პირადად დაათვალიერეს უშუალოდ ინფორმაციის დაცულობის ცენტრი.
„გასულ წელს, ისევე როგორც ამ არჩევნებზე გამოვლინდა დეზინფორმაციის, არასწორი ინფორმაციის გავრცელების ფაქტები. ეს არის ის საკითხი, რასაც ამომრჩეველი საერთო ჯამში მიჰყავს არასწორ აღქმებამდე და ამომრჩეველს უჩენს გარკვეულ კითხვის ნიშნებს როგორც საარჩევნო ადმინისტრაციის, ისე საარჩევნო პროცესის მიმართ. ამიტომ ჩვენთვის მნიშვნელოვანია, რომ დავიცვათ ის ინფორმაცია და რეალობა, რომელიც საარჩევნო პროცესის სწორად წარმართვისთვის ძალიან მნიშვნელოვანია.
ჩვენს მთავარ პარტნიორთან, IFES-თან ერთად, რომელიც ამ პროექტს USAID-თან ერთად ახორციელებს მივიღეთ გადაწყვეტილება, რომ ავამუშაოთ ისეთი მექანიზმი, რომელიც ზუსტად მოახდენს ერთი მხრივ ამ ინფორმაციის დაცვას და მეორე მხრივ მომავალში დეზინფორმაციის გავრცელების პრევენციას.
საუბარია ფაქტების კონსტატაციაზე, სტატისტიკური მონაცემების დამუშავებაზე. ჩვენ დავამონიტორინგებთ ყველა იმ ძირითად საშუალებას, რომელიც ავრცელებს ინფორმაციას საარჩევნო საკითხებთან მიმართებაში. მოვახდენთ არასწორ ინფორმაციასთან მიმართებაში სწორი ფაქტების მიწოდებას საზოგადოებისთვის. შემდეგ უკვე საზოგადოებამ უნდა გადაწყვიტოს რა იქნება მისთვის სარწმუნო და მისაღები. მთავარი არის ის, რომ ჩვენ დავიცვათ სწორი ინფორმაცია და არ მოხდეს საარჩევნო პროცესის და ინსტიტუციის დაზიანება,“ - განაცხადა გიორგი კალანდარიშვილმა დღევანდელი პრეზენტაციის შემდეგ.