მიხეილ კალანდიას 11 წლითა და სამი თვით თავისუფლების აღკვეთა მიესაჯა

2020-02-25 12:45:40, 7370 ნახვა

სამართალი

ხორავას ქუჩაზე მომხდარი მკვლელობის საქმის ერთ-ერთი ფიგურანტი მიხეილ კალანდია საქალაქო სასამართლომ დამნაშავედ სცნო.

კალანდიას 11 წლითა და 3 თვით თავისუფლების აღკვეთა მიესაჯა.

საქალაქო სასამართლოში კალანდიას საქმეზე განაჩენი მოსამართლე ნიკოლოზ მარსაგიშვილმა გამოაცხადა.

პროცესს ესწრებოდა მოკლული დავით სარალიძის მამა, ზაზა სარალიძე.

დავით სარალიძის ჯგუფურად მკვლელობაში მონაწილე, მიხეილ კალანდიას საქმეზე საქალაქო სასამართლომ 21 თებერვალს ფინალური მოსმენა გამართა, სადაც მხარეებმა საბოლოო სიტყვა წარადგინეს.

შეგახენებთ, რომ 2019 წლის 4 ივნისს, მიხეილ კალანდია ჯგუფურად, დამამძიმებელ გარემოებებში მკვლელობის ჩადენის ბრალდებით, დააკავეს. ხოლო აღკვეთის ღონისძიების სახით პატიმრობა 6 ივნისს შეუფარდეს.

დავით სარალიძის მკვლელობის ბრალდებით სასჯელს გიორგი ჯანაშია იხდის, რომელიც საპროცესო გარიგების საფუძველზე სასჯელაღსრულებით დაწესებულებას 2 წელში დატოვებს.