2015-07-15 14:48:44, 708 ნახვა

---

სულხან სულაძე: პროკურატურისგან არ მიგვიღია ინფორმაცია, საყდრისის აფეთქებასთან დაკავშირებით გამოძიება დაიწყო თუ არა

არასამთავრობო ორგანიზაცია ახალგაზრდა იურისტთა ასოციაციამ ახალი კვლევა „საყდრისი–ყაჩაღიანი – ნგრევა კანონის სახელით“ წარადგინა. 

როგორც საიას იურისტმა სულხან სულაძემ ჟურნალისტებს განუცხადა, საყდრისი–ყაჩაღიანის ობიექტისთვის კულტურული მემკვიდრეობის ძეგლის სტატუსის მოხსნის დროს საქართველოს კანონმდებლობის მოთხოვნა დაირღვა. 
კერძოდ, მისი თქმით, ამ პროცესში არ იყო ჩართული ეროვნული მუზეუმი, ქართულ–გერმანული არქეოლოგიური ჯგუფი.

„გადაწყვეტილებები მიღებული იყო სპონტანურად, მცირე დროის მონაკვეთში“, – აღნიშნა სულაძემ. 

კვლევის თანახმად,  2014 წლის 12 დეკემბერს, ერთი დღის განმავლობაში, საქართველოს კულტურისა და ძეგლთა დაცვის სამინისტრომ და კულტურული მემკვიდრეობის დაცვის ეროვნულმა სააგენტომ საყდრისი-ყაჩაღიანის უძველეს ოქროს მაღაროსთან დაკავშირებით, უაღრესად საეჭვო გარემოებებში,  ჯამში 17 ისეთი მოქმედება განახორციელეს და 4 ისეთი გადაწყვეტილება მიიღეს, რომელთა შედეგად, 2014 წლის 13 დეკემბერს შპს “RMG-Gold”-მა საყდრისი-ყაჩაღიანის არქეოლოგიური ობიექტი უკანონოდ ააფეთქა. 

ამასთან, 2014 წლის 12 დეკემბერს, კულტურული მემკვიდრეობის დაცვის ეროვნულმა სააგენტომ და კულტურისა და ძეგლთა დაცვის სამინისტრომ, საყდრისი-ყაჩაღიანთან დაკავშირებით ძეგლის სტატუსის მოხსნის მიზნით ადმინსტრაციული წარმოება საქართველოს კანონმდებლობის მოთხოვნათა უხეში დარღვევით ჩაატარეს. 

2014 წლის 13 დეკემბერს, „RMG-Gold”-ს, საყდრისი #1 ყაჩაღიანის უბანზე აფეთქების განსახორციელებლად, არ გააჩნდა სამრეწველო დანიშნულების ფეთქებადი მასალების გამოყენების ნებართვა. შესაბამისად, კომპანიამ აფეთქება უკანონოდ განახორციელა;

„ის, რომ აფეთქება მოხდა სრულიად უკანონოდ, ეს პირდაპირ მიანიშნებს, რომ სახეზეა სისხლის სამართლის დანაშაული და გამოძიება უნდა დაიწყოს. თუმცა, მიუხედავად ჩვენი მიმართვისა, პროკურატურისგან არ გვაქვს ინფორმაცია, დაწყებულია თუ არა გამოძიება“, – განაცხადა სულაძემ.

აქვე, სულაძემ დასძინა, რომ  იტალიელი გეოლოგის დასკვნის თანახმად,  შესაძლებელი იყო საყდრისი–ყაჩაღიანის საბადოს ტერიტორიაზე არქეოლოგიური სამუშაოები ჩატარებულიყო, თუმცა, მისივე თქმით, ეს კულტურული მემკვიდრეობის დაცვის სააგენტოში „ვერ შენიშნეს და ობიექტი ააფეთქეს“.

გარდა ამისა, საყდირისი–ყაჩაღიანში რთული გეოლოგიური მდგომარეობა მას შემდეგ გახდა აქტუალური საკითხი და განხილვის თემა, როდესაც ქართულ–გერმანულმა ჯგუფმა „არ–ემ–ჯი გოლდს“  ინფორმაცია მიაწოდა, თუ რა დაჯდებოდა ინტენსიური არქეოლოგიური სამუშაოების წარმოება“, – აცხადებს სულხან სულაძე. 

გარდა ამისა, საიას კვლევაში წერია, რომ 2014 წლის 13 დეკემბრიდან მოყოლებული, სააგენტომ ვერ უზრუნველყო საყდრისი-ყაჩაღიანის არქეოლოგიური ობიექტის ე.წ. „დაშლა (აღების)“ პერმანენტული მონიტორინგის მიზნით შექმნილი კომისიის შემადგნელობის ისე დაკომპლექტება, რომ სახეზე არ ყოფილიყო  ინტერსთა კონფლიქტის ნიშნები;

2014 წლის 29-31 დეკემბერს, „RMG-Gold”-თვის საყდრისი-ყაჩაღიანთან კავშირში მყოფი წიაღით სარგებლობის ლიცენზიის მოქმედების ვადის კონკრეტულ სალოკაციო ტერიტორიაზე გაგრძელების პროცესში - საქართველოს გარემოსა და ბუნებრივი რესურსების დაცვის სამინისტროს, კულტურული მემკვიდრეობის დაცვის ეროვნული სააგენტოს, საავტომობილო გზების დეპარტამენტის, გარემოს ეროვნული სააგენტოს და საქართველოს მთავრობის ფორსირებული მოქმედება აჩენს საფუძვლიან ეჭვს, რომ „RMG-Gold”-ს წინასწარ ჰქონდა ლიცენზიის გაგრძელების გარანტია და 2014 წლის ბოლოს გადაწყვეტილება მხოლოდ იურიდიულად გაფორმდა;

„საყდრისი-ყაჩაღიანის შემთხვევამ ნათლად და ცალსახად აჩვენა, რომ საეჭვო გარემოებებში, კანონმდებლობის მოთხოვნების გვერდის ავლით, შეიძლება მიღებული იყოს ისეთი გადაწყვეტილებები, რომლებიც, ეკონომიკური თუ სხვა ბუნდოვანი საინვესტიციო ინტერესების სახელით, საფრთხეს შეუქმნის კულტურული მემკვიდრეობის დაცვას, შენარჩუნებას და მომავალი თაობებისათვის გადაცემას.
 
საია მიიჩნევს, რომ 2013-2015 წლებში საყდრისი-ყაჩაღიანის ირგვლივ განვითარებული მოვლენები აუცილებლად უნდა გახდეს სამართალდამცავი ორგანოების მხრიდან ობიექტური გამოძიების საგანი“, – აცხადებენ საიაში.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი