ზურაბ გვასალია: ზედამხედველობის ფუნქცია ეროვნული ბანკიდან არ გამოდის, უბრალოდ მისი დამოუკიდებლობის ხარისხი უფრო მაღალი იქნება

2015-06-27 15:47:49, 707 ნახვა

ეკონომიკა

„არ ვეთანხმები იმ მოსაზრებას, რომ ზედამხედველობის ფუნქცია ეროვნული ბანკიდან გამოიყოფა, უბრალოდ მოხდება ამ ფუნქციის დამოუკიდებლობის ხარისხის ზრდა“,-ამის შესახებ საბანკო ასოციაციის პრეზიდენტმა ზურაბ გვასალიამ ჟურნალისტებს ეროვნული ბანკის შესახებ კანონში დაგეგმილი ცვლილების პირველი მოსმენით მიღების საკითხის კომენტირებისას განუცხადა.

მისივე თქმით, აღნიშნული ცვლილებით ზედამხედველობის სამსახურის ლეგიტიმაცია იზრდება.

„ზოგადად, რჩევები და კონსულტაციები კარგია, მეორე მოსმენამდე არის საკმაო დრო იმისათვის, რომ ეს რჩევები იყოს უფრო არგუმენტირებული. ასევე დარწმუნებული ვარ, რომ მთავრობა და პარლამენტი, ასევე დადებს იმ არგუმენტს თუ რატომ უნდა აიწიოს ზედამხედველობის ლეგიტიმაცია. მე არ ვეთანხმები იმ მოსაზრებას, რომ ეს ფუნქცია გამოყოფილი იქნება ეროვნული ბანკიდან, ის რჩება ეროვნული ბანკის შემადგენლობაში, უბრალოდ მას ექნება ბევრად უფრო მაღალი დამოუკიდებლობის ხარისხი“,-განაცხადა გვასალიამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან