საყდრისის დაცვის კომიტეტი რუსთაველის გამზირზე საპროტესტო აქციას მართავს

2015-05-26 14:06:43, 440 ნახვა

საზოგადოება

საყდრისის დაცვის კომიტეტი რუსთაველის გამზირზე, სადაც კულტურის სამინისტროს სტენდებია გამოფენილი, საპროტესტო აქციას მართავს.
აქციის მონაწილეები კიდევ ერთხელ აპროტესტებენ საყდრისის ოქროს მაღაროს აფეთქებას.
როგორც კომიტეტის წევრმა ნინო ბურჭულაძემ „ექსპრესნიუსს“ განუცხადა, საყდრისის აფეთქების ფონზე, როდესაც კულტურის სამინისტრო საკუთარ მიღწევებზე საუბრობს, უხერხულია. გარდა ამისა, მათ კულტურის მინისტრთან კითხვა აქვთ, დღევანდელ გამოფენაზე რატომ არაა წარმოდგენილი საყდრისის მუზეუმის კონცეფცია მაინც.
„აქ გამოფენილია კულტურის სამინისტროს სტენდები. საუბარია მიღწევებზე. გვინდა საზოგადოებას ვუთხრათ, რომ როცა ეს უწყება საყდრისის აფეთქების ფონზე საკუთარ მიღწევებზე საუბრობს, ცოტა უხერხულია. გარდა ამისა, როცა კომპანია „არ ემ ჯი გოლდი“ და კულტურის სამინისტრო რამდენიმე ხნის განმავლობაში გვარწმუნებდნენ, რომ საყდრისს ექნებოდა მისი შესაფერისი მუზეუმი, რატომ არაა გამოფენილი საყდრისის მუზეუმის კონცეფცია მაინც“, - აღნიშნა ბურჭულაძემ.
მისივე თქმით, სასამართლო 2014 წლის 12 დეკემბერს მიღებული აქტების კანონიერებაზე იმსჯელებს, რომლის თანახმადაც საყდრისს კულტურული მემკვიდრეობის ძეგლის სტატუსი მოეხსნა და კომპანია „არ ემ ჯი გოლდმა“ სამუშაოები აწარმოა.
„კულტურის მინისტრს და ძეგლთა დაცვის სააგენტოს წარმომადგენლებს მინდა შევახსენო, სასამართლომ მართალია სამუშაოები არ შეაჩერა გარკვეული მიზეზების გამო ძეგლის ტერიტორიაზე, თუმცა მისივე გადაწყვეტილებით, ის აუცილებლად იმსჯელებს 2014 წლის 12 დეკემბრის აქტების კანონიერებაზე და ობიექტური სასამართლოს პირობებში ჩვენ იმედი გვაქვს, რომ რამდენიმე ჩინოვნიკის სამართლებრივი პასუსიმგებლობის საკითხი დადგება“, - აღნიშნა ნინო ბურჭულაძემ.