მდინარაძე: პროკურატურა ბორის ჩაგუნავას გათავისუფლებაზე გადაწყვეტილების გასაჩივრებას აპირებს

2017-02-14 18:06:51, 2608 ნახვა

სამართალი კომენტარი

ფრაქცია „ქართული ოცნების“ თავმჯდომარის მამუკა მდინარაძის განცხადებით, პროკურატურა გივი თარგამაძის ავტომობილის აფეთქების საქმეში ფიგურანტის გათავისუფლების თაობაზე, სასამართლოს გადაწყვეტილების გასაჩივრებას აპირებს.

როგორც მდინარაძემ ჟურნალისტებს განუცხადა, საუბარია პიროვნებაზე, რომელსაც ბრალი იარაღის უკანონო შეძენა-შენახვაში ედება:

„თუ სწორი ინფორმაცია მაქვს, საუბარია იმ პიროვნებაზე, რომელსაც ბრალი უკანონოდ იარაღის შეძენა შენახვაში ედებოდა. მას სასამართლომ პირობითი მსჯავრი მიუსაჯა. რამდენადაც ვიცი, პროკურატურა სასამართლოს ამ გადაწყვეტილებას არ ეთანხმება და გასაჩივრებას აპირებს“,-აღნიშნა მდინარაძემ.

გივი თარგამაძის ავტომობილის აფეთქების ერთ-ერთ ეპიზოდზე დაკავებული ბორის ჩაგუნავა საქალაქო სასამართლომ 9 თებერვალს გაათავისუფლა. მას პირობითი მსჯავრი აქვს შეფარდებული.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან