დევნილთა სამინისტროში სამეთვალყურეო საბჭოს შეხვედრა გაიმართა

2015-02-25 14:25:00, 620 ნახვა

საზოგადოება

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში სამეთვალყურეო საბჭოს შეხვედრა გაიმართა.
ამის შესახებ „ექსპრესნიუსს“ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროდან აცნობეს.
უწყების ინფორმაციით, სამეთვალყურეო საბჭოს შეხვედრაზე მინისტრის მოადგილემ გვანცა შენგელიამ ევროკავშირის დელეგაციას „საქართველოში კონფლიქტით დაზარალებული იძულებით გადაადგილებული მოსახლეობისა და მასპინძელი თემების მხარდაჭერის პროგრამით გათვალისწინებული პირობების შესრულებასთან დაკავშირებული ანგარიში წარუდგინა.
ამასთან, შენგელიამ წარადგინა იძულებით გადაადგილებულ პირთა/დევნილთათვის საარსებო წყაროების ხელმისაწვდომობის უზრუნველყოფის სტრატეგიის განხორციელების 2015-2016 წ.წ სრულად განფასებული სამოქმედო გეგმა, რომლის იმპლემენტაციაში არასამთავრობო და საერთაშორისო დონორი ორგანიზაციებიც აქტიურად იქნებიან ჩართულნი.
შეხვედრაზე განხილულ იქნა ისეთი მნიშვნელოვანი საკითხები, როგორიცაა 2014 წლის ბოლო 6 თვის განმავლობაში იძულებით გადაადგილებულ პირთა/დევნილთა მიმართ სახელმწიფო სტრატეგიის სამოქმედო გეგმის შესრულების ანგარიში.
შეხვედრის დასასრულს, მხარეებმა საჭიროებებზე დაფუძნებული დახმარების პრიორიტეტული მხარეები განიხილეს და შემდგომ შეხვედრაზეც შეთანხმდნენ.

შეხვედრას ესწრებოდნენ მინისტრის მოადგილეები გრიგოლ გიორგაძე, გვანცა შენგელია, შოთა რეხვიაშვილი, საბჭოში შემავალი სამინისტროები წარმოდგენილი იყვნენ მინისტრის მოადგილეების დონეზე, შეხვედრას ასევე ესწრებოდნენ საქართველოში ევროკავშირის პროექტების მენეჯერი ნატალი ჰულუ, სახალხო დამცველის აპარატის, არასამთავრობო და საერთაშორისო ორგანიზაციების წარმომადგენლები.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან