სოლომონ პავლიაშვილი ატომური ენერგიის საერთაშორისო სააგენტოს გენერალური დირექტორის მოადგილეს, ჰუა ლიუსს შეხვდა

2023-09-30 12:23:52, 634 ნახვა

ეკონომიკა

ქ.ვენაში, ატომური ენერგიის საერთაშორისო სააგენტოს 67-ე გენერალური კონფერენციის ფარგლებში, გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი ატომური ენერგიის საერთაშორისო სააგენტოს გენერალური დირექტორის მოადგილეს და ტექნიკური თანამშრომლობის დეპარტამენტის უფროსს ჰუა ლიუსს შეხვდა. ამის შესახებ ინფორმაციას საქართველოს გარემოს დაცვისა და სოფლის მეურნეობის სამინისტრო ავრცელებს.

აღსანიშნავია, რომ საქართველო 2000 წლიდან ჩართულია სააგენტოს ტექნიკური თანამშრომლობის პროგრამაში, რომლის ფარგლებშიც ქვეყანაში მარეგულირებელი შესაძლებლობების გაძლიერების, რადიოაქტიური ნარჩენების მართვის, სურსათის უვნებლობის, ჯანდაცვის, წყლის რესურსების მართვისა თუ ენერგეტიკის სფეროებში შესაძლებლობების გაძლიერება ხდება.

"შეხვედრაზე, ჰუა ლიუსმა საქართველოს მიერ მიღწეულ პროგრესს გაუსვა ხაზი და აღნიშნა, რომ საქართველოს გარემოს დაცვისა და სოფლის მეურნეობის სამინისტროს ბირთვული და რადიაციული უსაფრთხოების სააგენტო ძლიერი მარეგულირებელი ორგანოა, რომლის საქმიანობა და ეროვნული მარეგულირებელი ჩარჩო შეესაბამება საერთაშორისო ვალდებულებებსა და სტანდარტებს. სოლომონ პავლიაშვილმა წლების განმავლობაში ქვეყნის პროგრესის მხარდაჭერისთვის მადლობა გადაუხადა ჰუა ლიუსს, რომელმაც, თავის მხრივ, თანამშრომლობის გაგრძელებისა და გაღრმავებისთვის მზადყოფნა გამოთქვა.

ამავე კონფერენციის ფარგლებში, სოლომონ პავლიაშვილი შვედეთის რადიაციული უსაფრთხოების მარეგულირებელი ორგანოს ხელმძღვანელს მაიკლ კნოხენჰაუერს შეხვდა. შეხვედრაზე სოლომონ პავლიაშვილმა მადლობა გადაუხადა შვედეთის სამეფოს ბირთვული უსაფრთხოების სფეროში მრავალწლიანი წარმატებული თანამშრომლობისთვის. მაიკლ კნოხენჰაუერმა გამოხატა რადიოაქტიური ნარჩენების მართვის ეროვნული სტრატეგიის იმპლემენტაციისა და ბირთვული მარეგულირებელი რეჟიმის მხარდაჭერის მზადყოფნა.

ავსტრიაში გამართული კონფერენციის ფარგლებში, ქართულ დელეგაციას ოფიციალურად გადაეცა ატომური ენერგიის საერთაშორისო სააგენტოს ბირთვული დაცულობის ეროვნული რეჟიმის შემფასებელი მისიის ანგარიში. ქვეყანამ ორკვირიან მისიას მიმდინარე წლის აპრილში უმასპინძლა. ბირთვული დაცულობის განყოფილების დირექტორმა, ელენა ბუგლოვამ ხაზგასმით აღნიშნა საქართველოსთან თანამშრომლობით მიღწეული შედეგები და გამოთქვა მხარდაჭერის გაფართოების სურვილი. სოლომონ პავლიაშვილმა ღიად დააფიქსირა ბირთვული დაცულობის განყოფილების კონტრიბუციის განსაკუთრებული მნიშვნელობა თანამედროვე გამოწვევების საპასუხოდ საქართველოს ეროვნული გეგმების გაძლიერებაში", - ნათქვამია ინფორმაციაში.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),