ეკა გიგაური სები-ს გადაწყვეტილებაზე - პრობლემები შეექმნება ყველა ბანკს

2023-09-20 01:45:59, 1183 ნახვა

ეკონომიკა

ეროვნული ბანკის მიერ სანქციათა რეჟიმის შესრულების წესში ცვლილებების შეტანას. "საერთაშორისო გამჭირვალობა - საქართველოს" აღმასრულებელი დირექტორი ეკა გიგაური ეხმაურება.

"პრობლემები შეექმნება ყველა ბანკს, რომელიც ფარცხალაძეს ან მის კომპანიას ანგარიშზე წვდომას მისცემს. ქართული საბანკო სისტემის ჩამოშლას ცდილობენ. როგორც ფარცხალაძეს დაუყადაღეს ანგარიშები, ზუსტად ასე, რიგითი მოქალქეების ანგარიშებს რომ შეეხოთ პრობლემა ამას აპირებენ ! ეს ხდება იმის გამო, რომ ერთმა რუსეთის აგენტმა ფარცხალაძემ თავისი ანგარიშიდან ფულის გამოტანა შეძლოს. დღეს ეროვნულმა ბანკმა ოფიციალურად განაცხადა, რომ სანქციების გვერდის არიდებაში ვეხმარებით პირსო ! და ეს მათ გააკეთეს მმართველი პარტიის დავალებით!" - წერს ეკა გიგაური.

მას შემდეგ, რაც მმართველი პარტიის თავმჯდომარემ, ირაკლი კობახიძემ ოთარ ფარცხალაძისთვის ანგარიშების შესაძლო დაყადაღებას არაკონსტიტუციური უწოდა, ეროვნულმა ბანკმა სანქციათა რეჟიმის შესრულების წესი შეცვალა. ცვლილებები ეროვნული ბანკის პრეზიდენტის 8 აგვისტოს ბრძანებაში დღეს, 19 სექტემბერს შევიდა.

მას სებ-ის პრეზიდენტობის მოვალეობის შემსრულებელი, ნათია თურნავა აწერს ხელს.

ყოფილი გენერალური პროკურორისთვის სანქციების დაწესების გადაწყვეტილება ამერიკის შეერთებულმა შტატებმა 14 სექტემბერს გამოაქვეყნა. ირაკლი კობახიძემ კი გუშინ, 18 სექტემბერს განაცხადა, რომ საქართველოს ეროვნული ბანკის მხრიდან ფარცხალაძისთვის ანგარიშების გაყივნა კონსტიტუციასთან წინააღმდეგობაში მოვიდოდა.

ის ამბობდა, ეროვნულ ბანკს შეუძლია უცხო ქვეყნის მოქალაქეს შეუზღუდოს კომერციული ან სხვა ტიპის საქმიანობა, თუმცა საქართველოს მოქალაქე კონსტიტუციით განსაკუთრებულადაა დაცული.

დღევანდელი ბრძანებით მიღებული ცვლილებებიც, სწორედ იმას განსაზღვრავს, თუ რა შემთხვევაში უნდა გავრცელდეს სანქციათა რეჟიმი საქართველოს მოქალაქეზე.

კერძოდ, ცვლილებების თანახმად, სანქციათა რეჟიმი საქართველოს მოქალაქეზე იმ შემთხვევაში გავრცელდება, თუ დაწესებულ სანქციებთან დაკავშირებით სასამართლოს გამამტყუნებელი განაჩენია გამოტანილი. იგივე პრინციპით გავრცელდება სანქციათა რეჟიმი იმ იურიდიულ პირზე, რომლის წილსაც სანქცირებული საქართველოს მოქალაქე ფლობს.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,