ზუგდიდის ადგილობრივი ბიუჯეტიდან საბავშვო ბაღებს 52 ათასი ლარი ჩაერიცხებათ

2015-09-24 18:02:43, 604 ნახვა

საზოგადოება

ზუგდიდის მუნიციპალიტეტის გამგებლის ედიშერ თოლორაიას გადაწყვეტილებით, სკოლამდელ სააღმზრდელო დაწესებულებებს ადგილობრივი ბიუჯეტიდან მიმდინარე სასწავლო წლისთვის დამატებით 52 ათასი ლარი ჩაერიცხება.
ბიუჯეტში დამატებული თანხით მიმდინარე წელს 11 გაზქურის, 4 მაცივრის, 5 გამწოვისა და 3 ელექტროღუმელის შეძენა იგეგმება.
ამის შესახებ ინფორმაცია საბავშვო ბაღის გამგეებს დღეს, გამართულ თათბირზე ზუგდიდის მუნიციპალიტეტის გამგებლის მოადგილე გიზო სართაიამ, ააიპ სკოლამდელი სააღმზრდელო დაწესებულებათა დირექტორმა, ციცანა თოლორაიამ, კულტურის სამსახურის უფროსმა მაია ჩიტაიამ მიაწოდეს.
მუნიციპალიტეტის გამგებლის მოადგილე გიზო სართანიამ სკოლამდელი სააღმზრდელო დაწესებულების გამგეებს სასწავლო წლის დაწყება მიულოცა და წარმატებები უსურვა. გიზო სართანიას ინფორმაციით, მიმდინარე წელს სოფლის მხარდაჭერის პროგრამის ფარგლებში 19 სასბავშვო ბაღეში ჩატარდა სარემონტო სამუშაოები. ბაღების კეთილმოწყობისა და რეაბილიტაციის სამუშაოები მომავალშიც გაგრძელდება.
„ჩვენ ეტაპობრივად ყველა საბავშვო ბაღში შევქმნით თანამედროვე სისტემას, კეთილმოეწყობა და იქნება პატარებისთვის ადაპტირებული გარემო. ვიცით, რომ არსებობს პრობლემები და ეს აუცილებლად მოსაგვარებელია “, – განაცხადა გიზო სართანიამ.
ააიპ სკოლამდელი სააღმზრდელო დაწესებულების დირექტორის ციცანა თოლორაიას ინფორმაციით, წელს მოხდება საბავშვო ბაღებში დეზობარიერების შეტანა შესასვლელსა და გასასვლელებში ასევე სამზარეულოს შესასვლელში.
ციცანა თოლორაიამ ბაღის გამგეებს ბაღის დისციპლინისა და შინაგანა წესის დაცვისკენ მოუწოდა და განმარტა, რომ მკაცრად იქნება გაკონტროლებული ბავშვების დაგვიანება და გაცდენის შემთხვევები.
სასწავლო წელს, რომელიც 5 ოქტომბერს დაიწყება მუნიციპალიტეტის მასშტაბით 40 საბავშვო ბაღი ჩაერთვება, ხოლო დანარჩენი ოთხი ბაღი, მიმდინარე სარემონტო სამუშაოების გამო, რამდენიმე დღით გვიან დაიწყებს სასწავლო პროცესს.