13-14 ივნისს მომხდარი სტიქიის შედეგად მდინარე ვერეს ხეობის და მისი მიმდებარე ტერიტორიის მდგომარეობის შესწავლისა და შემდგომი აღდგენითი სამუშაოების ორგანიზების მიზნით შექმნილი უწყებათაშორისი კომისიის პირველი სხდომა ხვალ გაიმართება, - ამის შესახებ საქართველოს პრემიერ-მინისტრმა ირაკლი ღარიბაშვილმა საგანგებო შტაბის დღევანდელ სხდომაზე განაცხადა.
მისი განმარტებით, შექმნილია სამუშაო ჯგუფი, კომისიის მუშაობაში ჩასართავად სპეციალისტებისა და ექსპერტებისთვის კარი ღიაა.

მთავრობის მეთაურის ინფორმაციით, მზიურში მიმდინარე საძიებო და გაწმენდით სამუშაოებში მეხანძრე მაშველთა 300 კაციან და განსაკუთრებულ დავალებათა დეპარტამენტის 200 კაციან ჯგუფთან ერთად აქტიურად მონაწილოებდნენ მოხალისეები, რომელთა რიცხვი 600-ზე მეტია. მოხალისეთა კოორდინაცია ადგილზე ხორციელდებოდა შსს-ის და მერიის წარმომადგენელთა მიერ. მისივე თქმით, გრძელდება ზოოპარკის ტერიტორიის დასუფთავება და მიმდინარეობს წყლის ამოტუმბვა. ბოლო მონაცემებით, კვლავ დაკარგულად ითვლება ერთი მცირე ზომის ვეფხვი და ერთი აფთარი. პრემიერმა მოსახლეობას კიდევ ერთხელ მოუწოდა მაქსიმალური სიფრთხილისა და ყურადღებისკენ.

საგანგებო შტაბის წევრებს ფინანსთა მინისტრმა ნოდარ ხადურმა შემოწირულობების სახით მობილიზებული თანხის შესახებ ინფორმაცია მიაწოდა. მისი განცხადებით, შემოწირულობა 6 მილიონ ლარს აჭარბებს, გარდა ამისა, მობილიზებულია 120 ათასი დოლარი ასევე კერძო პირებისაგან.

„რაც შეეხება დონორ ორგანიზაციებს, ევროკავშირი 3 მილიონ ევროს გამოყოფს სახლების ასაშენებლად; მსოფლიო ბანკი და გაეროს განვითარების პროგრამა სამი მიმართულებით დაეხმარება - ჰუმანიტარული დახმარება, ზიანისა და დანაკარგების შეფასება, საშუალო და გრძელვადიანი რისკების მართვა. აღნიშნული ორგანიზაციების ექსპერტები მზად არიან დახმარებისთვის. აშშ-ის საერთაშორისო განვითარების სააგენტო გვთავაზობს მდინარე ვერეს გასწვრივ ტერიტორიის გეოლოგიურ შესწავლას, ასევე ზოოპარკის დახმარებას. აზიის განვითარების ბანკი მზად არის, ამ ეტაპზე, მოკლევადიან პერიოდში 11 მილიონი დოლარის რესურსი გამოგვიყოს. ეს თანხა პირველ ეტაპზე მოაკლდება თბილისი-რუსთავის ავტომაგისტრალს, თუმცა ის შემდეგ შეივსება და მაგისტრალის მშენებლობა არ შეფერხდება. ისინი ასევე მზად არიან, გვესაუბრონ 57 მილიონის იაფ რესურსზე. შავი ზღვის ვაჭრობისა და განვითარების ბანკი მზად არის, გამოყოს 50-დან 100 ათას დოლარამდე ზოოპარკის რეაბილიტაციისთვის. შვედეთის საელჩო მზად არის, ექსპერტები და გეოლოგები ჩამოიყვანოს, რომლებიც დაგვეხმარებიან. გერმანიის მთავრობას გავუგზავნეთ საჭიროებათა ანალიზი და ისინი მზად არიან ჰუმანიტარული დახმარებებისთვის,“–აღნიშნა ნოდარ ხადურმა.

საგანგებო შტაბის სხდომაზე ცნობილი გახდა, რომ არსებობს ახალი ზოოპარკის პროექტი. პირველადი მონაცემებით, ახალი თანამედროვე ზოოპარკის ღირებულება დაახლოებით 22 მილიონი ევროა და ის თბილისის ზღვის მიმდებარე ტერიტორიაზე განთავსდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

iFact: სანქცირებული ტანკერის ტვირთი ყულევის პორტში ჩავიდა

პარლამენტმა სახელმწიფო ქონება იმპორტზე აქციზის გადასახადისგან გაათავისუფლა

რუსეთმა შეერთებულ შტატებს ევროპიდან ყველა ბირთვული იარაღის გაყვანა მოსთხოვა

პუტინის ბირთვული მუქარის შემდეგ ნატოს ქვეყნებმა რეკორდული ტემპით ჩადეს ინვესტიციები ბირთვულ იარაღში