სამოქალაქო მოძრაობა „ძალა ერთობაშია“ პოლიტიკურ კოალიციად ყალიბდება

2018-09-01 16:47:47, 1875 ნახვა

პოლიტიკა

საპრეზიდენტო და საპარლამენტო არჩევნებში, სამოქალაქო მოძრაობა „ძალა ერთობაშია“ ერთიან პოლიტიკურ კოალიციად მიიღებს მონაწილეობას.

ამის შესახებ გაერთიანებული ოპოზიციის ერთ-ერთმა წარმომადგენელმა, ნიკა მაჭუტაძემ, დღეს გამართულ ბრიფინგზე განაცხადა.

„საქართველოს პრეზიდენტის მიმდინარე და პარლამენტის უახლოეს არჩევნებზე სამოქალაქო მოძრაობა ძალა ერთობაშია ყალიბდება ერთიან საარჩევნო კოალიციად. საქართველოს პარლამენტის უახლოეს არჩევნებზე მოძრაობის ყველა სუბიექტს, რომელიც დარეგისტრირდება საარჩევნო სუბიექტად, უპირობოდ ექნება შესაძლებლობა, გახდეს მოძრაობის ბაზაზე შექმნილი საარჩევნო ბლოკის წევრი. ამავე არჩევნებზე პარლამენტის არჩევნების კანდიდატთა პროპორციული სიის პირველი მეორე და მესამე ათეული დაკომპლექტდება პლატფორმის წევრი პოლიტიკური გაერთიანებები თითო წარმომადგენლით", - განაცხადა ნიკა მაჭუტაძემ.

ცნობისთვის, საპრეზიდენტო არჩევნები 28 ოქტომბერს გაიმართება. რაც შეეხება საპარლამენტო არჩევნებს, ის 2020 წელს ჩატარდება.