რუსეთი რიგის სამიტზე: ახალი სამიტი, მაგრამ ძველი სიმღერა

2015-05-23 12:34:40, 1452 ნახვა

მსოფლიო

"ახალი სამიტი, მაგრამ ძველი სიმღერა," – ასე აფასებს „აღმოსავლეთ პარტნიორობის“ რიგის სამიტის შედეგებს ოფიციალური მოსკოვი.

რუსეთის საგარეო საქმეთა სამინისტრომ განცხადება გამოაქვეყნა, სადაც აღნიშნულია, რომ სამიტის საბოლოო დეკლარაციაში დადასტურებულია ის დებულებები, რომელიც ვილნიუსის სამიტზე იყო მიღებული.
"აღმოსავლეთ პარტნიორობა ზეიდეოლოგიზირებულ გეოპოლოტიკურ პროექტად რჩება, რომლის რეალიზებაზეც ნეგატიურ გავლენას ევროკავშირის წევრი ანტირუსული განწყობის მქონე ქვეყნები ახდენენ", – ნათქვამია განცხადებაში.
სერგეი ლავროვის უწყებაში ასევე აღნიშნავენ, რომ ევროკავშირმა კიდევ ერთხელ გაახმოვანა საკუთარი არაადეკვატური პოზიცია ყირიმთან დაკავშირებით. მოსკოვში აცხადებენ, რომ ევროკავშირმა უნდა ისწავლოს ხალხის თავისუფალი არჩევანის პატივისცემა.
ოფიციალური მოსკოვი ასევე აცხადებს, რომ სამიტის მონაწილეებმა ევროკავშირის წევრი ქვეყნების მხრიდან "აღმოსავლეთ პარტნიორობის“ პროექტისადმი არაერთგვაროვან პოზიციაში რუსეთი დაადანაშაულეს და ამაში ახალი არაფერია.
მოსკოვი აგრეთვე, მზადყოფნას გამოთქვამს ევროკავშირთან კონსტრუქციული თანამშრომლობისთვის.