თბილისის მერი კახა კალაძე ევროპის ადგილობრივ  და რეგიონულ  ხელისუფლებათა კონგრესის (СLRA) წარმომადგენლებს შეხვდა. შეხვედრაზე მხარეებმა კონგრესისა და ადგილობრივი თვითმმართველობების თანამშრომლობაზე,  დედაქალაქში დემოკრატიული განვითარების პროცესზე, გამოწვევებსა   და   თვითმმართველობის როლის გაძლიერებაზე ისაუბრეს.  

თბილისის მერმა, რომელიც, ამავდროულად, საქართველოს ადგილობრივ თვითმმართველობათა ეროვნული ასოციაციის პრეზიდენტს და  კონგრესში საქართველოს დელეგაციის ხელმძღვანელს წარმოადგენს,  ადგილობრივი თვითმმართველობის რეფორმასა და ბოლო პერიოდში განხორციელებულ საკანონმდებლო ცვლილებებზე ისაუბრა. კახა კალაძის თქმით, ქალაქის დემოკრატიული განვითარებისთვის მნიშვნელოვანია ხელისუფლებისა და მოსახლეობის მეტი სიახლოვე, რაც ადგილობრივ პროექტებსა  და გადაწყვეტილებების მიღების პროცესში მოსახლეობის მაქსიმალურ ჩართულობას გულისხმობს.  თბილისის მერმა ამ პროცესში ერთ-ერთ მნიშვნელოვან ინსტრუმენტად დედაქალაქის ბიუჯეტის დაგეგმვაში მოქალაქეების ჩართულობა დაასახელა. 

„სერიოზული მუშაობა მიმდინარეობს, რომ მაქსიმალურად გავზარდოთ მოსახლეობის ჩართულობა ქალაქის აღმშენებლობის პროცესში. შევქმენით  ისეთი ვებპლატფორმა, რომელიც  მოქალაქეებს აძლევს შესაძლებლობას,  თავიანთი ხედვები, იდეები და  კონკრეტული პროექტები წარუდგინონ  ქალაქის მერს. პროექტს ჰქვია „შენი იდეა ქალაქის მერს“ და გარკვეული ხმების დაგროვების შემთხვევაში ჩვენ გვაქვს ვალდებულება, განვიხილოთ  კონკრეტული პროექტები  და შემდეგ მივიღოთ მათი  განხორციელების გადაწყვეტილება. პროექტს კარგი გამოხმაურება აქვს და წარმატებით მიმდინარეობს.  შემდეგ ეტაპზე, მაისის თვეში წარვადგენთ   ბიუჯეტის დაგეგმვის პროცესში  მოსახლეობის ჩართულობის პროექტს, რომლის მიხედვითაც მოსახლეობა თავად შეძლებს  საკუთარ რაიონსა და უბანში  ინფრასტრუქტურული პრიორიტეტების განსაზღვრას. მაგალითად,  მოსახლეობა  თვითონ აირჩევს,  პირველად  გზა უნდა გაკეთდეს,  სკვერი მოეწყოს თუ  გამწვანების სამუშაო ჩატარდეს“, - განაცხადა თბილისის მერმა.

კახა კალაძემ   ხაზი გაუსვა კონგრესთან თანამშრომლობის  მნიშვნელობას, გამოცდილების გაზიარებისა და ადგილობრივი თვითმმართველობის  ევროპულ სტილთან დაახლოების თვალსაზრისით.  

 „ძალიან საინტერესო შეხვედრა იყო. ვისაუბრეთ  თვითმმართველობის როლის გაძლიერებაზე, განხორციელებულ და განსახორციელებელ პროექტებზე. ბოლო წლების განმავლობაში მნიშვნელოვანი ნაბიჯები იქნა გადადგმული თვითმმართველობის გასაძლიერებლად.  თუმცა გასაკეთებელი ამ მიმართულებით კიდევ ბევრია. ჩვენ აქტიურად ვმუშაობთ და ყველაფერს გავაკეთებთ იმისთვის, რომ  თვითმმართველობის  როლი და ფუნქცია ადგილობრივ დონეზე კიდევ უფრო გამოკვეთილი იყოს და  ქალაქიც შესაბამისად განვითარდეს. ჩვენ მზად ვართ, ამ მიმართულებით გავიზიაროთ და გავითვალისწინოთ ევროპული გამოცდილება და რეკომენდაციები“, - განაცხადა თბილისის მერმა.   

ევროპის საბჭოს ადგილობრივ და რეგიონულ ხელისუფლებათა კონგრესის წევრები ადგილობრივი თვითმმართველობის წარმომადგენლებს მონიტორინგის მისიის ფარგლებში ხვდებიან. მისიის მიზანია, ევროპის წევრ სახელმწიფოებში შეამოწმოს ადგილობრივი დემოკრატიის დონე და მათი შესაბამისობა ადგილობრივ თვითმმართველობათა ევროპულ ქარტიასთან. 
 
2018 წელს საქართველო იმყოფება მონიტორინგის ფაზაში. კონგრესის წარმომადგენლების მიერ მომზადებული მონიტორინგის ანგარიში შესაბამისი რეზოლუციებისა და რეკომენდაციების შესამუშავებლად  ევროპის საბჭოს გენერალური მდივანს წარედგინება.  

შეხვედრას  თბილისის მერის მოადგილე ირაკლი ხმალაძე, მერიის ეკონომიკური განვითარების საქალაქო სამსახურის უფროსი ანდრია ბასილაია, საფინანსო სამსახურის უფროსი გაიოზ თალაკვაძე და საკრებულოს დეპუტატი ბექა დავითულიანი ესწრებოდნენ.

(NS)

ავტორი: ,

სოციალური ქსელები

კობახიძე თელავის სტიქიაზე - ნებართვები არასწორად იყო გაცემული. ასე მიმაჩნია, თუმცა შევისწავლით

აქტივისტ ისაკო დევიძეს საპროცესო შეთანხმება გაუფორმდა - ის საპატიმროს 6 თვეში დატოვებს

14-16 ივლისს საქართველოში მოსალოდნელია მაღალი ტემპერატურის ფონზე დროგამოშვებით ნალექიანი ამინდი

კობახიძე - ქვეყანა იმართება ეფექტიანად, მათ შორის ეკონომიკური თვალსაზრისით