ნაძალადევში დიდი ჯიხაიშის ქუჩის სარეაბილიტაციო სამუშაოები აქტიურად მიმდინარეობს

2017-01-06 16:22:19, 1191 ნახვა

საზოგადოება

ნაძალადევის რაიონში დიდი ჯიხაიშის ქუჩის კაპიტალური რეაბილიტაცია გრძელდება.

თბილისის მერიის ინფორმაციით, ნაძალადევის რაიონის გამგეობისა და „ჯორჯიან უოთერ ენდ ფაუერი“- ს ერთობლივი პროექტის ფარგლებში, მთლიანად იცვლება მიწისქვეშა კომუნიკაციების ქსელი, რის შემდეგაც დაიგება ასფალტის საფარი.

მათივე ინფორმაციით, სამუშაოები ნაძალადევის რაიონის გამგებელმა ირაკლი ხელაძემ დაათვალიერა.

გამგებელმა „ჯორჯიან უოთერ ენდ ფაუერი“- ს კონტრაქტორი კომპანიის ხელმძღვანელებისგან პროექტის მიმდინარეობის შესახებ ინფორმაცია მოისმინა.

დიდი ჯიხაიშის ქუჩის ფართობი 10 010 კვ.მ-ია. სარეაბილიტაციო სამუშაოების საერთო ღირებულება 1 475 500 ლარს შეადგენს.

პროექტის მიხედვით, მთლიანად გაიმართება წყალმომარაგებისა და წყალარინების სისტემა - ახლით იცვლება 3 900 გრძივი მეტრი წყალსადენის მაგისტრალური მონაკვეთი და წყალარინების 2 500 მეტრი სიგრძის ქსელი.

ასევე მონტაჟდება ევროსტანდარტების ჩამკეტ-მარეგურებელი ურდულები და ჭები.

მიწისქვეშა კომუნიკაციების რეაბილიტაციას„ჯორჯიან უოთერ ენდ ფაუერი“ მარტში დაასრულებს, რის შემდეგაც სამუშაოებს ნაძალადევის რაიონის გამგეობის კონტრაქტორი კომპანია გააგრძელებს და ქუჩაზე მთლიანად მოწესრიგდება საგზაო ინფრასტრუქტურა.

(NS)