ვაზიანში, IV მექანიზირებული ბრიგადის სამწყობრო მოედანზე, ავღანეთის ისლამურ რესპუბლიკაში „მტკიცე მხარდაჭერის“ სამშვიდობო მისიაში მონაწილე 43-ე ბატალიონის გაცილების ცერემონიალი გაიმართა.

ღონისძიება საქართველოს სახელმწიფო ჰიმნით გაიხსნა, რომელიც ეროვნული გვარდიის სამხედრო-საჩვენებელმა ორკესტრმა შეასრულა. ქართველ სამხედროებს სიტყვით მიმართა საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ. მან სამშვიდობოებს „მტკიცე მხარდაჭერის“ მისიის წარმატებით შესრულება და სამშობლოში მშვიდობით დაბრუნება უსურვა.

ცერემონიალზე დასასწრებად თბილისში სპეციალურად ჩამოვიდა ევროპაში აშშ-ის საზღვაო ქვეითი ძალების სარდლის მოადგილე, ბრიგადის გენერალი ნორმან ქულინგი. სიტყვით მიმართვისას ამერიკელმა გენერალმა და აშშ-ის საგანგებო და სრულუფლებიანი ელჩის მოადგილემ ნიკოლას ბერლინერმა ქართველი სამხედროების პროფესიონალიზმს გაუსვეს ხაზი და მისიისთვის გადასროლისწინა წვრთნების წარმატებით დასრულება მიულოცეს.

ღონისძიებას თავდაცვის მინისტრის პირველი მოადგილე გოჩა რატიანი, შეიარაღებული ძალების ხელმძღვანელი პირები და 43-ე ბატალიონის სამხედრო მოსამსახურეების ოჯახის წევრები დაესწრნენ.

გაცილების ცერემონიალის დასასრულს პირადი შემადგენლობა შეიარაღებული ძალების მთავარმა კაპელანმა, მამა გაბრიელმა დალოცა.

დღესვე, IV მექანიზირებული ბრიგადის ბაზაზე გენერალ-მაიორმა ვახტანგ კაპანაძემ 43-ე ბატალიონის სამხედრო მოსამსახურეებთან ერთად კვიპაროსები დარგო.

საქართველოს შეიარაღებული ძალების IV მექანიზირებული ბრიგადის 43-ე ბატალიონი ავღანეთში, ბაგრამის საავიაციო ბაზაზე 51-ბატალიონს ჩაანაცვლებს. 43-ე ბატალიონთან ერთად პირველად ჩაერთვება სამშვიდობო მისიაში ეროვნული გვარდიის გაძლიერებული ოცეული. ქართველი სამხედროები 6 თვის განმავლობაში, „მტკიცე მხარდაჭერის“ მისიის ფარგლებში ამერიკელ საზღვაო ქვეითებთან ერთად, სრული სპექტრის ოპერაციებს განახორციელებენ. მათი მთავარი ამოცანა ბაგრამის საავიაციო ბაზის უსაფრთხოების უზრუნველყოფა იქნება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პაპუაშვილი – 12 აგვისტო, ერთი მხრივ, არის დიდგორის გამარჯვების დღე, მეორე მხრივ კი, 2008 წლის კაპიტულანტური შეთანხმების დღე

კალაძე რუს ბლოგერს არწმუნებდა, რომ რუსებს საქართველოში დაუვიწყარი დღეები ელით

ვადაგასული პროდუქცია და ჰიგიენის უხეში დარღვევები - „ანაკლიას“ საწარმოო პროცესი შეუჩერეს

სასკოლო ფორმის ყიდვა ნაღდი ფულით შეუძლებელი იქნება - სამინისტრომ რეალიზაციის წესი დაამტკიცა